Андижонлик Назира Амирбоева ва дугонаси Мафтуна Эгамбердиева(судланувчиларнинг исм-шарифлари ўзгартирилган)лар мушук ишқибози эди. Аниқроғи зотдор мушукларни парваришлаш ҳамда кўпайтириб сотиш орқали даромад топишни ўзларига касб қилиб олишганди. Охир-оқибат иккала аёл ана шу ишқибозликлари туфайли суднинг қора курсисига ўтиришди.

Гап шундаки, Telegram ижтимоий тармоғида «ВОДИЙ МУШУК БОЗОРИ» номли гуруҳ мавжуд эди. Яна бир андижонлик ишқибоз Раъно Қўрғонова 2022 йил январь ойида қизига мушук олиб бериш мақсадида мазкур гуруҳга қўшилади. Натижада Наманган вилоятида яшовчи нотаниш кимсадан бир дона зотдор мушук сотиб олади. Кейин эса ўз мушугини бошқа зотдор мушукка қўшиб, кўпайтирмоқчи бўлади. Шу боис 2022 йил март ойида юқоридаги гуруҳга эълон жойлаштиради.

Шундан сўнг эълонга кўзи тушган, Олтинкўл туманида яшовчи Назира Амирбоева Р.Қўрғонова билан алоқага чиқади.

-Сиз сўраган зотдор эркак мушук менда бор,-дейди у мулоқот чоғида.

Н.Амирбоева шундай деб мушугининг расмини Раънога юборади. Қолаверса, 50 АҚШ доллари эвазига мушугидан насл олишга рози бўлади. Бинобарин, Раъно Қўрғонова урғочи мушугини Назираникига элтиб беради. Хизмат ҳақи сифатида олдиндан 300.000 сўм пул ҳам беради.

Гарчи Р.Қўрғонова 50 АҚШ доллари беришга розилик билдирган бўлсада, аслида бу нарх унга қимматлик қилади. Шунинг учун у арзонроқ мушук қидириб, “ОLX.UZ” сайтига киради.

Буни қарангки, “ОLX.UZ” сайтида нафақат арзон мушуклар, ҳатто бепул бериладиган мушуклар ҳақида ҳам эълонлар жойлаштирилган экан. Ушбу эълонларни ўқиб, Раъно баъзи мушукларни 50-100 минг сўмдан, айримларини эса бепул олиб, яшаш хонадонига келтириб парваришлай бошлайди. Шу билан бирга, жониворларнинг расмларини «ВОДИЙ МУШУК БОЗОРИ» гуруҳига жойлаштириб, кимгадир арзон нархда сотади, лозим топганларини эса бошқа бировларга ҳадя қилиб юборади. Табиийки, унинг бу ҳаракатлари фақат моддий манфаат эвазига иш қиладиган Назира Амирбоевага ёқмайди. Оқибатда Telegram гуруҳида иккала аёл тортишиб қолишади. Уларнинг можаросига Н.Амирбоеванинг дугонаси Мафтуна Эгамбердиева ҳам қўшилади. Бу ҳам етмагандек, Назира Раънони «ВОДИЙ МУШУК БОЗОРИ» Telegram гуруҳидан чиқариб ташлаб, унинг профилини блоклаб қўяди ҳам. Шу боис Р.Қўрғонова ижтимоий тармоқда «АНДИЖОН МУШУК БОЗОРИ» номли янги гуруҳ яратиб олади. Кўп ўтмай, Н.Амирбоева бундан хабар топиб, янги гуруҳга қўшилиб олади. Лекин бу ҳолат гуруҳ обуначиларига ёқмайди. Бинобарин, Раъно Назирани ўзи очган гуруҳдан чиқариб, профилини блоклаб қўяди.

Айнан мана шу ҳолатдан кейин Раъно ва Назира ўртасидаги зиддият янада кескинлашади. Келишмовчилик шу даражага етадики, Н.Амирбоева ва М.Эгамбердиева «ВОДИЙ МУШУК БОЗОРИ» гуруҳида Р.Қўрғоновани турли беҳаё сўзлар билан ҳақорат қилишади. Бундан ҳам қаноатланмай, иккала дугона Раънони бегона эркаклар билан кўнгилхушлик қилиб юришини айтиб, унга туҳмат қилишади. У ёғини сўрасангиз, Telegram гуруҳига 6296 нафар обуначи аъзо бўлиб, ўзлари отаётган ҳақорат ва туҳмат тошларидан шунча одам хабар топишини яхши билишарди Назира ва Мафтуна.

Бундан ташқари, Н.Амирбоева 2023 йил 6 февраль куни Раъно истиқомат қиладиган Саноат МФЙ раисининг олдига бориб, унинг бегона эркаклар дон олишиб юришини ёлғондан айтиб ҳам туҳмат қилиб кетади.

Албатта, бундай ҳақорат ва туҳматга ҳеч ким тоқат қилолмайди. Шунинг учун Р.қўрғонова ИИБ ходимларига мурожаат қилиб, ижтимоий тармоқдаги ўзига қаратилган ҳақорат ва туҳмат гаплар тасвирини қонун ҳимоячиларига тақдим этади.

Шундан сўнг Назира Амирбоева ва Мафтуна Эгамбердиеваларга нисбатан жиноят иши қўзғатилади. Жиноят ишлари бўйича Булоқбоши туман суди эса уларни Жиноят кодексининг 139-моддаси 2-қисми, 140-моддаси 2-қисми билан айбдор деб топиб, кодекснинг 59-моддаси тартибида озодликни чеклаш жазосига маҳкум этди.

Бош қомусимизнинг 13-моддасида «Ўзбекистон Республикасида демократия умуминсоний принципларга асосланади, уларга кўра инсон, унинг ҳаёти, эркинлиги, шаъни, қадр-қиммати ва бошқа ажралмас ҳуқуқлари олий қадрият ҳисобланади» дея қайд этилган. Шундай экан, кўпчилик орасида ўзгаларни беҳурмат қилиб, ҳақорат ва туҳмат тошларини отишга ҳеч ким ҳақли эмас.

Шоҳруҳ ВАҲОБОВ,

жиноят ишлари бўйича Булоқбоши туман суди раиси