ЯнгиликларМаҳаллийМонополист истеъмолчилар ҳуқуқларини бузишда давом этмоқда – Расул Кушербаев

Монополист истеъмолчилар ҳуқуқларини бузишда давом этмоқда – Расул Кушербаев

«UzAuto Motors» 4-позиция Chevrolet Cobalt’ни кутаётган мижозларга автомобил ўриндиғини иситиш модулисиз таклиф этмоқда экан.

Ушбу комплектация 1 миллион сўмни ташкил этади ҳамда ушбу сумма мижозга қайтариб бериларкан.

Компаниянинг ушбу ҳаракатлари бир қатор саволларни келтириб чиқаради.

Биринчи, истеъмолчига компания яримўтказгич топа олдими-йўқми қизиғи йўқ. У ҳақини тўлаган вассалом. Компания нега бошқа мамлакатлар автомобил саноатига ўхшаб, аввал автомобилни ишлаб чиқариб кейин сотувга чиқармаяпти? Нега йўқ нарсага олдиндан пул олади?

Иккинчи, компаниянинг истеъмолчига кўрсатмаган хизмат ёки бермаган товари учун олдиндан ҳақ тўлаб ишлаши ҳалол ва қонунийми?

Учинчи, компания нуқсонли товар бергани ёки истеъмолчига вақтида товарни бермагани учун неустойка(пеня) ҳам тўлаши керак. Бунинг ҳисоб-китоби борми?

Чунки, “Истеъмолчиларнинг ҳуқуқларини ҳимоя қилиш тўғрисида”ги Қонуннинг 19-моддасида “Нуқсонлар белгиланган муддатда бартараф этилмаган, шунингдек, иш бажаришни (хизмат кўрсатишни) бошлаш ва тугаллаш кечиктирилган тақдирда, ижрочи истеъмолчи ҳар бир кечиктирилган кун, соат (агар муддат соатларда белгиланган бўлса) учун иш (хизмат) қийматининг ёки буюртма қийматини (агар унинг қиймати алоҳида белгиланмаган бўлса) бир фоизи миқдорида неустойка (пеня) тўлайди”, деган норма бор.

Оддий айтганда, кимдир 100 миллион сўмлик автомобилга пул тўлади-ю, автомобил айтилган комплектацияда бўлмаса ёки вақтида ҳаридорга етказиб берилмаса, ҳар ўтказиб юборилган кун учун унга 1 миллиондан пул тўланади. Агар 100 кун кечикса 100 миллион тўлайди.

Айтганча, шу қонун нормасини компанияга янги келган ҳорижлик бош директоргаям билдириб қўйишса яхши бўларди.

Юқоридагилардан келиб чиқиб, Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигига айни ҳолатни ўрганиб, истеъмолчиларни ҳимоя қилиш масаласида расман сўров киритдик.

Истеъмолчиларга нисбатан бундай камситувчи муносабат учун Агентликдан кескин чора кутиб қоламиз. Судлар ҳам бу сафар истеъмолчи ҳуқуқига кўз юммас. Зеро, Ўзбекистон — ҳуқуқий давлат!

Алоқадор мақолалар

Сўнгги янгиликлар

spot_img