Португалиялик тиббиёт ходимаси, 41 ёшли Соня Асеведо (Sonia Acevedo) коронавирусга қарши Pfizer/BioNTech вакцнасини қабул қилганидан кейин 48 соат ўтиб вафот этди. Бу ҳақда Daily Mail хабар қилмоқда.
Аёл 30 декабрь куни вакцина қабул қилгач, аввалига ҳеч қандай ножўя таъсирларни ҳис қилмаган, бироқ 1 январь куни кутилмаганда вафот этган. Ҳали ўлим сабаблари ошкор этилмаган.
Марҳуманинг жасади тиббий экспертизадан ўтказилгач, текширув натижалари эълон қилиниши кутилмоқда.
Асеведонинг отаси марҳуманинг соппа-соғ бўлганини айтмоқда. “Вакцинадан кейин бирор бир аломат сезилмади, лекин қизим нимадан ўлганини билолмаяпман. Мен, албатта, бунинг тагига етаман”, — дейди Абилио Асведо.
Аёл Португалиянинг Порту шаҳридаги онкология институтида ишлаган. Унинг ҳамкасблари ҳам вакцинациядан кейин Соня ўз ишини бир неча соат бемалол давом эттирганини айтишган. Асеведодан ташқари у билан ишлаган яна 537 нафар тиббиёт ходими ҳам коронавирусга қарши эмланган.
Препарат Американинг Pfizer/BioNTech консорцими томонидан ишлаб чиқилган ва айни пайтда коронавирусга қарши Евроиттифоқ томонидан тасдиқланган ягона вакцина бўлиб қолмоқда. ЕИ мамлакатлари учун ҳозирга қадар 200 миллион ана шундай вакцинага буюртма берилган.