“Тропикамид”, “Зардекс” психотроп дори воситаси каби дори воситаларида гиёҳванд моддалардаги каби ўзига ўргатиб қўйишдек хусусият бор. Бу инсонни ўзига тобе қилиб қўяди. Меъёридан ортиқ истеъмол қилиш инсон ўлимига олиб келиши мумкин. Шу боис, психотроп дори воситаларини фақатгина рецепт асосида дорихоналар орқали сотиш белгиланган.
Буни қарангки, С.Султонова, Р.Каримов, Ф.Мансуров, Ж.Абдуқаюмов, Б.Назиров ва А.Турдалиевлар (исм-шарифлар ўзгартирилган) ўзларини гўёки адолат посбони, деб билишиб, фуқаро А.Дўстов ўзича жазолашмоқчи бўлишади. “Тропикамид” психотроп дори воситалари ноқонуний савдоси билан шуғулланишини исботлаш ниқобида бир гуруҳ бўлиб, унга нисбатан талончилик қилишади.
Талончилар биринчи маротаба 2020 йил 27 октябрь тунги соат 00:30да А.Дўстов билан учрашиб, унинг бошқарувидаги автомашинаси салонидан нархи 1 млн. сўмлик “Samsung J-1” русумли ва нархи 1 млн. 200 минг сўмлик “Samsung Galaxy Grand Prime PLUS” русумли телефон аппаратларини, 2 млн. 600 минг сўм нақд пулларини, автомашина юкхонасидан нархи 680 минг сўмлик аёллар тилла узугини ҳамда автомашина йўловчиси Ш.Умаровнинг ёнидан 20 минг сўм нақд пулларни олиб, очиқдан-очиқ талон-торож қилишади.
Шундан сўнг яна 28 октябрь тунги соат 22:30да А.Дўстовни телефон аппаратларини қайтариб беришни айтиб, алдаб чақиришиб, уни уриб, ёнидан 450 минг сўм нақд пулларини ва автомашинаси салонидан нархи 50 минг сўмлик кўзойнакни, нархи 200 минг сўмлик атирни ва 120 минг сўм нақд пулларни зўрлик ишлатиб, талон-торож қилишган.
Бу ҳолат 2020 йил 29 октябрь тунги соат 23:00да такрорланади. А.Дўстовнинг ёнидан нархи 3 млн. сўмлик “Samsung S9 PLUS” телефон аппаратини ва 10 минг сўм нақд пулларини зўрлик ишлатиб олиб қўйишади.
Бу ҳам етмагандек, муқаддам икки маротаба судланган А.Турдалиев 2020 йил 2 ноябрь куни соат 16:00 да дорихонага кириб ичиш учун сув сўрайди. Сотувчи ичимлик суви олиб чиқиш учун ичкарига кирган вақтида растадан ошиб ўтиб, сотувчининг телефон аппаратини, “Зардекс” дорисини ва кассадаги пулларни олади. Сув олиб чиқаётиб бу ҳолатга гувоҳ бўлган сотувчи унга қаршилик кўрсатмоқчи бўлганида уни калтаклаб ҳушидан кетказиб дорихонадан чиқиб кетади.
Хуллас, талончилар тўқиб олган баҳоналари ўзларининг бошига бало бўлди. Адолатни иддао қилган талончиларга адолатли суд хукми ўқилди.
Темир ҚОСИМОВ,
Жиноят ишлари бўйича Яккасарой туман суди судьяси