Америка Қўшма Штатлари Украинага 31 та M1 Abrams танкини етказиб беради, ҳарбий ёрдамга бошқа мамлакатлардан етказиб бериладиган таъминот ҳам қўшилади. Бу ҳақда чоршанба куни АҚШ президенти Жо Байден маълум қилди.
Америка президентининг сўзларига кўра, танкларни етказиб бериш вақт талаб этади, аммо АҚШ тезда украиналик танкчиларни тайёрлаш чораларини кўриш ҳақида гапирди.
“Баҳор яқинлашар экан, Украина қўшинлари ўзлари эгаллаб турган ҳудудни ҳимоя қилиш устида ишламоқда ва қўшимча қарши ҳужумга тайёргарлик кўрмоқда. Ўз ҳудудларини озод қилиш учун улар Россиянинг ривожланаётган тактикаси ва жанг майдони стратегиясига жуда қисқа муддатда қарши тура олиши керак”, – деди Байден.
Шу билан бирга, Байден Қўшма Штатлар Украина муаммоси “адолатли шартлар асосида” ҳал этилишини исташини айтди.
“Бугунги эълон дунё бўйлаб Америка Қўшма Штатлари бошчилигидаги давлатларнинг Украинага ўз суверенитети ва ҳудудий яхлитлигини ҳимоя қилишда ёрдам бериш мажбуриятига асосланади. Бу Россияга ҳужум қилиш учун таҳдид эмас”, – деди Байден.
Сешанба куни АҚШ маъмуриятининг Украинага катта миқдордаги M1 Abrams танкларини юбориш нияти маълум бўлди. Етказиб бериш Германия билан кенгроқ дипломатик келишувнинг бир қисмини ташкил қилади, унга кўра Берлин ўзининг Leopard 2 танкларини Киевга жўнатади, якуний қарор чоршанба куни Германия ҳукумати томонидан эълон қилинди.
Бундан ташқари, Германия ҳукумати Польша ва бошқа мамлакатлар томонидан Германияда ишлаб чиқарилган танкларни етказиб беришни маъқуллади.
Аввалроқ Россиянинг АҚШдаги элчиси Анатолий Антонов Россия Қуролли кучлари Вашингтон Киевга топширадиган барча танкларни йўқ қилишини айтган эди. Мутахассислар эса Германиянинг Leopard 2 машиналари ва Американинг Абрамслари Украинанинг ёпишқоқ қора тупроғи синовидан ўтмайди, деган фикрни билдиришди.