Америка Қўшма Штатларида Дональд Трамп тарафдорлари томонидан сайловдан норозилик намойишлари уюштирилмоқда.
Fox News телеканалининг хабар беришича, Вашингтондаги намойиш пайтида AҚШ президенти Дональд Трамп тарафдорлари ва полиция ўртасида тўқнашувлар келиб чиққан.
Маълум бўлишича, Трампнинг бир неча юз тарафдорлари Байден кичик фарқ билан ғалаба қозонган баҳсли ҳудудлардаги сайловчиларнинг овозларини ҳисобламасликни талаб қилиб норозилик намойишларига чиқишган.
Телеканал маълумотларига кўра, 5 январь куни кечқурун намойишчилар ва полиция ўртасида тўқнашувлар бўлган. Ҳуқуқни муҳофаза қилиш органлари ходимлари намойишчиларни тарқатиш учун қалампир пуркагичдан фойдаланган.
ОAВ маълумотларига кўра, сешанба куни кечқурунгача камида олти киши турли хил ҳуқуқбузарликлар, шу жумладан, қурол ва ўқ-дориларни сақлаш ва полиция ходимига тажовуз қилишда айбланиб, ҳибсга олинган.
Дональд Трамп эса ўз тарафдорларини Twitterдаги саҳифасида шундай қўллаб-қувватлади:
“Вашингтон ғолибликка ўғрилик орқали эришган демократларни кўришни истамайдиган одамлар билан тўлиб тошган. Бўлди, бас! Ортиқ уларни кўришни истамаймиз. Биз сизни Овал идорадан эшитамиз (ва сизни яхши кўрамиз). Келинг, Aмерикани яна буюкликка кўтарайлик!”.
Трамп президентлик сайловидаги мағлубиятини тан олмаяпти. 306 сайловчи Байденга, 232 нафари Трампга овоз берган. Натижа 6 январь куни Конгресс томонидан тасдиқланиши керак. Сайланган Президентнинг инаугурацияси (президентлик рутбасини қабул қилишнинг тантанали маросими) 20 январга белгиланган.
Aввалроқ Спутник радиоси Пенснинг сайлов натижаларини қайта кўриб чиқишдан бош тортганини Трамп тан олмаётгани ҳақида хабар берган эди.