АТ “Алоқабанк” Самарқанд ҳудудий филиалининг Иштихон комплекс хизматлар кўрсатиш маркази собиқ раҳбари 9 нафар фуқаронинг номига 262,2 млн сўм микроқарз ажратиб, ўзлаштириб юборган, номига кредит ажратилган одамлар эса бундан бехабар. У 2 та “ISUZI” юкмашинасини сотиб олиш учун хусусий корхонага ажратилган 900 млн сўм кредитни ҳам нақдлаштириб олган. Бу ҳақда Бош прокуратура ҳузуридаги Департамент хабар беряпти.
Чирчиқда бўлса “Sh.S.” МЧЖ раҳбари Р.Т. ва бошқалар Д.Д.га тегишли нотурар бинони гаровга қўйиб, банк филиалидан ажратилган кредит эвазига харид қилинган 430 млн сўмлик қурилиш материалларини сотиб юборгани аниқланган.
Гулистонда “D.Q.” МЧЖ раҳбари қурилиш материаллари сотиб олиш учун ҳудудий тижорат банки филиалидан ажратилган кредит эвазига олинган қурилиш материалларини сотиб юбориб, жами 400 млн сўмни ўзлаштирган.
Хабарда айтилишича, ҳозирда ушбу шахсларга жиноят иши очилган, тергов ҳаракатлари ўтказилмоқда.