Энди тарафлар биргаликда нотариал идорага келолмасалар турли ҳудудлардаги нотариал идоаралардан туриб масофадан видеоконференцалоқа режимида битимни нотариал тасдиқлаши мумкин, бунда улар бир вақтнинг ўзида нотариуслар ҳузурида бўлиши шарт.
Бундай тартибда барча турдаги битимларни тасдиқлаш мумкин. Бундай битимни нотариал тасдиқлаш учун тарафлар нотариусга ариза билан мурожаат қиладилар.
Битимни биринчи тарафи ҳужжатларни тақдим қилади. Нотариус ҳужжатларнинг қонунийлигини ўрганиб чиқиб, тегишли битим лойиҳасини электрон шаклда тузади, битим лойиҳасини чоп этиб, битимни тегишли қисмига биринчи тарафга имзо қўйдиради ва бармоқ изларини сканер қилади, бу жараён видеоконференцалоқа орқали тизимда тўлиқ қайд қилинади. Битим нотариус томонидан имзоланиб, тасдиқланиб, мулк ҳуқуқини тасдиқловчи ҳужжатлар ва бошқа ҳужжатлар сканер қилиниб, тизимга жойлаштирилади.
Битимнинг иккинчи тарафи мурожаат қилган нотариус тизимга жойлаштириган ҳужжатларни юклаб олади ва чоп қилади.
Тизим орқали битимнинг биринчи тарафи мурожаат қилган нотариус билан видеоконференцалоқа орқали видеомулоқот ўрнатади, бунда нотариус ва тарафлар тасвирга тўлиқ туширилиши шарт.
Нотариус иккинчи тарафга қандай битим тузилаётганлигини тушунтиради, битимни овоз чиқариб ўқиб эшиттиради. Битимнинг иккинчи тарафи томонидан битим имзолангандан кейин унинг бармоқ излари сканер қилинади ва бу жараён видеоконференцалоқа орқали тизимда тўлиқ қайд қилинади.
Битимнинг тасдиқловчи ёзувида битим видеоконференцалоқа тизими орқали масофадан туриб тасдиқланганлиги кўрсатилиши лозим.
Тарафлар томонидан имзоланган ҳужжатлар йиғмажилд шаклига келтирилади. Яхлит ҳолга келтирилган битим иккинчи томон мурожаат қилган нотариус томонидан сканер қилиниб, тизимда шу реестр билан қайд қилинган карточкага жойлаштирилади.
Битим икки нусхада тузилади, бир нусхаси битимнинг иккинчи тарафи мурожаат қилган нотариал идорада сақланади, иккинчи нусхаси битимнинг иккинчи тарафига берилади.
Замира Қодирова,
Навоий шаҳрида хусусий амалиёт билан шуғулланувчи нотариус