“Press Trust of India” ўзбек болаларининг ўлимига сабаб бўлган дори воситасини ишлаб чиқарган Marion Biotech компаниясининг лицензияси бекор қилингани ҳақида хабар берди.
23 март куни Marion Biotech фармацевтика фирмасининг ишлаб чиқариш лицензияси Уттар-Прадеш штат органлари томонидан бекор қилинди. Энди Marion Biotechга ҳар қандай ишлаб чиқариш билан шуғулланиш мутлақо тақиқланди.
Marion Biotech компанияси ишлаб чиқарган “Док-1 Макс” йўтал сиропи Ўзбекистонда 18 боланинг ўлимига сабаб бўлган эди. Ўтган йилнинг декабрь ойида содир бўлган воқеа Ҳиндистондаги марказий ва штат наркотикларга қарши кураш идораларини бу борада тергов бошлашга ундади.
Январь ойидан бошлаб фирма лицензияси тўхтатилган, шундан сўнг текширув бошланган. Фирма лицензияси энди Уттар-Прадеш гиёҳванд моддаларни лицензиялаш бошқармаси томонидан бекор қилинди.
3 март куни полицияси Marion Biotech компаниясининг 3 ходимини 67-сектордаги офисидан ҳибсга олган, шу билан бирга компаниянинг икки директорига қидирув эълон қилинган.
Терговда Marion Biotech текширув жараёнида дори намуналарини сохталаштиргани аниқланган. Намуналар ҳукуматнинг Чандигарҳдаги минтақавий дори синов лабораториясига юборилган ва улардан 22 таси ностандарт сифат, сохталаштирилган деб топилган.
Ҳозирда компанияга нисбатан Ҳиндистон Жиноят кодексининг 274 (дориларни қалбакилаштириш), 275 (қалбаки дори воситаларини сотиш), 276 (дори-дармонларни сотиш) моддалари бўйича иш қўзғатилган.