2020 йилда шаърий никоҳ асосида оила қурдик ва ўртамизда 2021 йилда туғилган бир нафар фарзадимиз бор.Фарзандимга ўзимни фамилиямни берганман. Бир йилдан буён эрим билан бирга яшамаяпман ва мен ундан алимент талаб қилмоқчиман.Лекин эшитишимча, алиментга беришим учун аввал оталикни белгилатишим керак экан. Ҳозирда фарзандимга оталикни қандай белгилатсам бўлади ва қандай ҳужжатлар керак бўлади?
Бухоро вилояти, Шофиркон тумани З.Эсанбоева.
Жавоб:Оталик ҳамма вақт ҳам ихтиёрий равишда белгиланавермайди.Шаърий никоҳда бўлган оилада туғилган боланинг отаси оталикни қайд этишни инкор этса, бу ҳолатда бола манфаатини ҳимоя қилиб, суд тартибида оталикни белгилашга йўл қўйилади. Ушбу ҳолат Оила кодексининг 62-моддасига кўра оталикни суд тартибида белгилаш ота-онадан бирининг ёки боланинг васийси ёхуд ҳомийси, ёки кимнинг қарамоғида бўлса шу шахснинг аризасига кўра амалга оширилади. Агарда бола вояга етган бўлса, унинг ўзи берган аризасига мувофиқ амалга оширилади.
Суд томонидан оталикни белгилатганда, боланинг онаси бола туғилишига қадар жавобгар билан бирга яшаганлиги ва умумий рўзғор юритганлигини ёки улар болани биргаликда тарбиялаганликлари ёхуд таъминлаб турганликларини ёки жавобгарнинг оталикни тан олганлигини аниқ тасдиқловчи бошқа далилларни эътиборга олади.
Қолаверса, суд оталикни белгилаш вақтида жавобгарнинг боланинг отаси эканлигини тасдиқловчи аниқ далилларга асосланади.
Оталикни белгилаш тўғрисидаги суднинг ҳал қилув қарори қонуний кучга киргандан кейин суд шу қарор нусхасини бола туғилганлиги рўйхатга олинган жойдаги ФХДЁ органига юборади.Оталикни белгилатиш учун қуйидаги ҳужжатлар керак бўлади:
-ўзаро қонуний никоҳда бўлмаган ота-онанинг оталикни белгилашни сўраб ёзган аризаси:
-ота-онанинг шахсини тасдиқловчи ҳужжатлари –паспорт, уларнинг ўрнини босувчи ҳужжатлар:
-боланинг туғилганлик ҳақидаги гувоҳномаси (агар туғилиши олдин қайд этилган бўлса) талаб этилади.
Шайхонтоҳур туман
адлия бўлими масъул ходими
Ч. ҒАНИЕВА