13-14 март кунлари “Гендер-ҳуқуқий экспертиза гендер тенгликни таъминлаш воситаси сифатида” мавзусида семинар-тренинг ўтказилмоқда.
Семинар-тренинг Адлия вазирлиги томонидан USAID нинг Ўзбекистонда ҳуқуқий ислоҳот бўйича дастури (Legal Reform Program) доирасида ташкил этилган.
Қонунчилик ҳужжатлари ва уларнинг лойиҳаларини гендер-ҳуқуқий экспертизадан ўтказиш 2019 йилдан жорий этилган.
Тадбирнинг биринчи кунида иштирокчиларга гендер-ҳуқуқий экспертиза тушунчаси, уни ўтказиш тартиби ҳамда бу борадаги халқаро ва хорижий тажриба бўйича амалий кўникмалар берилди.
Семинар-тренингнинг иккинчи кунида гендер-ҳуқуқий экспертизанинг лойиҳаларни жамоатчилик муҳокамасидан ўтказиш, тартибга солиш таъсирини баҳолаш каби норма ижодкорлигининг бошқа институтлари билан ўзаро боғлиқлиги кўриб чиқилади.
Шунингдек, семинар-тренинг давомида Барқарор ривожланиш мақсадларига эришишда гендер-ҳуқуқий экспертизасининг аҳамияти, 2030 йилга қадар ривожланиш концепция ва стратегиялари амалий машғулотлар ва гуруҳларга бўлиниб, интерактив муҳокама қилиш режалаштирилган.
Бу борадаги тўпланган тажриба гендер-ҳуқуқий экспертизасининг ривожланишига ва натижада миллий қонунчилигимизда хотин-қизлар ва эркаклар учун тенг ҳуқуқ ҳамда имкониятларни янада кенгроқ кафолатланишига имкон яратади.
