Бош саҳифаЯнгиликларЎзбекистонИндивидуал тусдаги масалалар бўйича фармон ва қарор...

Индивидуал тусдаги масалалар бўйича фармон ва қарор шаклида қабул қилинган ҳужжатлар ҳам давлат ҳисобига олинади

“Норматив-ҳуқуқий ҳужжатларнинг ҳисобини юритиш қоидаларини тасдиқлаш тўғрисида”ги буйруқ Адлия вазирлигида давлат рўйхатидан ўтказилди (рўйхат рақами 3311, 19.06.2021 й.).

Қонунчилик ҳужжатларини давлат ҳисобига олишнинг янги тартиби тасдиқланди.

Унга кўра:

➖ барча турдаги қонунчилик ҳужжатлари Aдлия вазирлиги томонидан марказлаштирилган ҳолда давлат рўйхатидан ўтказилади;

➖ Президент ва Вазирлар Маҳкамаси фармойишлари давлат ҳисобига олинади;

➖ Президентнинг кадрлар масалалари, фуқаролик, афв этиш, сиёсий бошпана бериш, давлат мукофотлари билан тақдирлаш ва олий ҳарбий ва махсус унвонларни бериш ҳамда индивидуал тусдаги бошқа масалалар бўйича фармон ва қарор шаклида қабул қилинган ҳужжатлар ҳам давлат ҳисобига олинади.

Lex.uz да эълон қилинган барча қонунчилик ҳужжатлари назорат ҳолатида сақланади. Яъни, ҳар бир қонунчилик ҳужжатида унга киритилган ўзгартириш ёки қўшимчалар ёки ўз кучини йўқотган деб топиш тўғрисидаги маълумотлар акс эттирилади.

Шу билан бирга, Aдлия вазирлигида қонунчилик ҳужжатларнинг назорат нусхалари қоғоз шаклида ҳам юритилади.

Бу борада, илгари матнга тегишли ўзгартиришлар тўғрисидаги маълумотлар ёпиштирилган бўлса, эндиликда қонунчилик ҳужжатига ўзгартириш киритишга асос бўлган ҳужжатлар рўйхати (ўзгартириш ва қўшимчалар киритиш ёки бекор қилиш) унга илова қилинади.

Давлат идоралари ҳам ўз фаолиятига оид қонунчилик ҳужжатларининг назорат нусхаларини юритишни шу тартибда олиб боради.

Ушбу ҳужжат 2021 йил 1 июлдан эътиборан кучга киради.

Мазкур ҳужжатнинг матни билан қуйидаги ҳавола орқали танишишингиз мумкин: lex.uz/docs/5461800.

Ижтимоий тармоқлар

Сўнгги янгиликлар

Тавсия этамиз