Сенатнинг Хотин-қизлар ва гендер тенглик масалалари қўмитасининг навбатдаги мажлисида Сирдарё ва Тошкент вилоятида ижтимоий ҳимояга муҳтож хотин-қизларни ҳар томонлама қўллаб-қувватлаш, оилаларнинг турмуш даражасини ошириш бўйича амалга оширилган ишлар ҳолати таҳлилий муҳокама этилди.
Таъкидланганидек, жорий йилнинг 1 ноябрь ҳолатига кўра, “Аёллар дафтари” билан ишлаш тизимининг 3-босқичида 6 та тоифа бўйича Сирдарё вилоятида 14 364 нафар ва Тошкент вилояти бўйича 59 260 нафар хотин-қизларнинг муаммолари ҳал этилган.
Ҳар икки вилоятда ҳам хотин-қизларни онкологик скринингдан ўтказиш, нуроний онахонлар маҳаллаларда чуқурлаштирилган тиббий кўрикдан ўтказиш ва касаба уюшмалари санаторийларида даволанишлари ташкил этилган.
Ўтган давр мобайнида ёлғиз кексалар, пенсионерлар, ногиронлиги бўлган хотин-қизларга тиббий-ижтимоий ёрдам берилишига катта эътибор қаратилган. Хусусан, Сирдарё вилоятида 776 нафар ва Тошкент вилоятида
1 917 нафар ва хотин-қизлар протез-ортопедия буюмлари, реабилитация техник воситалари, шахсий гигиена воситалари билан таъминланган.
Ўз навбатида, сенаторлар томонидан ижтимоий ҳимояга муҳтож хотин-қизларни қўллаб-қувватлашда, жумладан, эҳтиёжманд қатламнинг уй-жойга оид эҳтиёжини қондириш, бандлигини таъминлаш, касбга ўқитиш, субсидиялар тақдим этиш орқали рўзғорини бойитиш борасидаги ишларда муаяйн камчиликлар борлиги қайд этилди. Мазкур саъй-ҳаракатлар замирида, аввало, инсон қадр-қимматини жойига қўйиш масаласи кўндаланг турганлиги, вазирлик ва идоралар ҳамда ҳар икки вилоят ҳокимликлари белгиланган кўрсаткичлар ижросига масъулият билан ёндашиши кераклиги уқтирилди.