— Бундан 2 ой олдин Қозоғистонга келин бўлиб тушдим. Кўчиб кетаётганимда ҳамма ҳужжатларим, хусусан, паспорт, ҳайдовчилик гувоҳномаси, дипломларимни йўқотиб қўйдим. Мен пойтахтда вақтинчалик «прописка»да турар эдим. Энди ҳужжатларимни тиклаш учун Ўзбекистонга қайтиб келишим керакми? «Прописка»м нима бўлади? Келин бўлиб тушган жойимга «прописка»га олишмаяпти.
— Паспорт йўқотиб қўйилганида ID-картага алмаштирилади. Бунинг учун фуқаро ички ишлар органларининг миграция ва фуқароликни расмийлаштириш бўлинмасига шахсан мурожаат қилиши лозим.
Миллий ҳайдовчилик гувоҳномаси эгасининг белгиланган тартибдаги аризаси, унинг олдинги ҳайдовчилик гувоҳномаси (эски намунадаги ҳайдовчилик гувоҳномалари учун — унинг талони ҳам) ҳамда эгасининг фуқаролик паспорти ёки унинг ўрнини босувчи бошқа ҳужжат тақдим этилганидан сўнг алмаштирилади. Бунинг учун ҳам фуқаро шахсан Давлат йўл ҳаракати хавфсизлиги хизматининг ҳудудий бўлинмасига мурожаат қилиши лозим.
Автомототранспорт воситаларини охирги ўн икки ой давомида бошқарган шахсларнинг миллий ҳайдовчилик гувоҳномалари тегишли имтиҳонларсиз алмаштирилади.
Дипломни тиклаш учун эса, фуқаро қайси олий таълим муассасасини тамомлаган бўлса, ушбу муассасага мурожаат қилиши лозим.
Агар фуқаронинг яшаш жойи бўйича вақтинчалик рўйхатга қўйилган муддати тугаган бўлса, у қайтадан рўйхатга туриши учун ушбу уй эгаси (мулкдор)нинг розилиги талаб этилади.
Саволга Тошкент шаҳар судининг фуқаролик ишлари бўйича судьяси Ахрор Сулаймонов жавоб берди.