Олий Мажлис Қонунчилик палатасидаги «Миллий тикланиш» демократик партияси фракциясининг навбатдаги йиғилишида депутатлар кун тартибига киритилган қонун лойиҳаларини партия мақсад ва вазифаларидан келиб чиққан ҳолда муҳокама қилди.
Айниқса, “Қимор ва таваккалчиликка асосланган бошқа ўйинларни ташкил этиш, ўтказиш ва тарғиб қилиш билан боғлиқ ноқонуний фаолиятга қарши курашиш тизими такомиллаштирилиши муносабати билан Ўзбекистон Республикасининг Жиноят, Жиноят-процессуал ҳамда Маъмурий жавобгарлик тўғрисидаги кодексларига ўзгартиш ва қўшимчалар киритиш ҳақида”ги қонун лойиҳасининг муҳокамаси қизғин кечди.
Таъкидланганидек, сўнгги йилларда қимор ва таваккалчиликка асосланган бошқа ўйинлар, жумладан, онлайн қимор ўйинлари кенг оммалашмоқда. Натижада бу онлайн қимор ўйинларида иштирок этган фуқароларнинг ўз жонига қасд қилиш, фирибгарлик, бюджет маблағларини талон-торож қилиш каби салбий ҳолатларнинг кўпайишига сабаб бўляпти.
Маълумотларга қараганда, қимор ўйинлари бўйича маъмурий ҳуқуқбузарликлар сони 2019 йилда 1 454 та бўлган бўлса, бу кўрсаткич 2020 йилда 2 864 та, 2021 йилда 3 372 та ва жорий йилнинг 6 ойида 2 325 тани ташкил қилди.
Шунингдек, 2019 йилда бу билан боғлиқ 55 та жиноят қайд этилган бўлса, биргина 2022 йилнинг 6 ойида бу рақам 90 тага кўпайди. Бундай салий оқибатлар қимор ва таваккалчиликка асосланган ўйинларни ташкил этиш ва ўтказиш билан боғлиқ ноқонуний фаолиятга қарши курашиш тизимини такомиллаштириш заруратини келтириб чиқарди.
Таклиф этилаётган қонун лойиҳаси билан Жиноят, Жиноят-процессуал ҳамда Маъмурий жавобгарлик тўғрисидаги кодексларига ўзгартиш ва қўшимчалар киритилмоқда. Яъни, жавобгарлик чоралари кескин кучайтирилмоқда.
Муҳокамалар давомида депутатлар қонун лойиҳаси юзасидан ўз фикр-мулоҳазаларини билдирди. Партия мақсад ва вазифаларидан келиб чиқиб бир қатор таклифлар берилди. Узоқ давом этган савол-жавоблар ва тортишувлардан сўнг, қонун лойиҳаси фракция аъзолари томонидан қўллаб-қувватланди.
Йиғилишда шунингдек, мамлакатимиз ижтимоий-сиёсий ҳаётига дахлдор бўлган бир қатор қонун лойиҳалари ҳам кўриб чиқилди.