Февраль ойида ижтимоий тармоқларда араб давлатларида кенг тарқалган «бурқа» кийган номаълум аёлнинг «Аёллар эҳтиёт бўлинг» номли видеолавҳаси тарқалди. Унда аёлларнинг ташқи кўриниши танқид қилинган.
Ички ишлар вазирлиги Матбуот хизматининг хабар беришича, текширишлар ўтказилганда видеоролик муаллифи 2003 йилда Тошкент шаҳрида туғилган, пойтахтдаги олий таълим муассасаларининг бирида таҳсил олувчи фуқаро Қ.Ш. эканлиги аниқланган ва қиз 2 март куни Шайхонтоҳур тумани ИИО ФМБга таклиф этилган.
Суҳбатда қиз видеодаги фикрлари шахсий диний қарашлари ифодаси эканини, ҳозир уйида “бурқа” араб либосини тикиб, аёлларга сотаётганини айтган.
Жамиятда қабул қилинган хулқ-атвор нормалари ва қоидаларига риоя этишда инсонлар ўзларининг диний ва ахлоқий қарашлари орқали бошқаларга баҳо бериши ёки бошқача кўринишда шахсий ҳаётига аралашиши мумкин эмас.
ИИВнинг эслатишича, диний мазмундаги материалларни диншунослик экспертизасининг ижобий хулосаси олинганидан кейин тайёрлаш ва тарқатиш мумкин.
Қ.Ш.га базавий ҳисоблаш миқдорининг 50 баробари миқдорида жарима жазоси тайинланди.