Бугун тонгдан тармоқни хушхабар тўлқинлантирди – Самарқанд шаҳрида тўрт нафар 11-синф ўқувчиси юқори қаватдан тушиб кетаётган қизчани қутқариб кун қаҳрамонларига айланишди.
Йигитлар суратда худди “Осмондаги болалар” фильми қаҳрамонларидек, ўша ёшда, ўша орзу-умидларга бой, ҳатто қиёфалари ҳам ўхшашдек.
Уларнинг 3 нафари Самарқанд шаҳридаги 80-ўрта умумтаълим мактаби ўқувчилари, бир нафари эса Жиззахдан дўстларини кўргани келган меҳмон, у ҳам 11-синфда ўқийди.
Танишинг:
Hudud24 қаҳрамонлар билан боғланиб, воқеа тафсилотлари ва келажак режалари ҳақида сўради.
Журналистлар, камералар, масъуллар, тадбирлар ичра талаш тўрт оғайни номидан Шоҳрух Бобораҳимов гапирди. Суратда у қизалоқни кўтариб олган.
– Опажон, бугун эрталабдан бери менга қўнғироқ қилган минг биринчи одам бўласиз, ҳеч муболағасиз. Очиғи, биз бундай шов-шувни кутмагандик. Ўзи воқеани ҳеч кимга айтмагандик ҳам. Қизчанинг онаси ва қўшнилари гувоҳ бўлишган эди, улар бошқаларга айтишган, шу билан тарқаб кетди.
– Воқеа қандай бўлди?
– 1 июнь куни мактабда математикадан давлат имтиҳонини топшириб, Жиззахдан меҳмонга келган дўстимиз Мурод билан кўчада суҳбатлашиб, эндиги режаларни муҳокама қилиб турган эдик. Бир пайт Жасур рўпарамиздаги уйнинг 4-қаватида дераза панжараси орасига боши билан тиқилиб осилиб қолган қизчани кўриб қолди. Биз ўша томонга чопдик, Жасур подъездга югурди, ичкаридан кириб қизчани қутқариш учун. Мен, Мурод, Озод домнинг тагига бордик ва қизча тушиши мумкин бўлган жойда қўлларимизни бир-бирининг орасидан ўтказиб “панжара” ясадик.
Бир пайт қизча 4-қаватдан мевадек узилиб тушиб кела бошлади. 2-қаватга етганида ўртада чиқиб турган домнинг ортиқча жойига урилиб айланиб чаппача бўлди, кейин яна пастга туша бошлади. Нақ менинг қўлимга тушди. Дўстим қўлимнинг тагидан қўлини ўтказиб олганди, мабодо менинг қўлим дош беролмаса, ёрдам учун. Худога шукурки, қизчани маҳкам ушлаб ололдим. У юмшоққина тушди.
Уни тутиб олиб ерга ётқиздик, мабодо бирор ери синган бўлса ё ички қон кетиш бўлса, зарар кўпаймасин деб ортиқча ҳаракатлантирмаслик учун ушлаб турдик. Жуда қўрққан эди. Лекин ақл-ҳуши жойида эди, гапираётганди. Панжарага қисилиб қолганидан боши сал шилинганди. Қўшнилардан сув олиб чиқиб юзига сепдик, тинчлантиришга ҳаракат қилдик.
– Онаси қаерда экан?
– Онаси ўша ерда эди. Бирровга ташқарига нимагадир чиққанида эшиги қулфланиб, қизча ичкарида қолиб кетибди. Онаси эшикни очтириш учун ширкатдан сантехник чақиришга пастга тушган экан. Шу пайт қизча ойнадан қараб ўзича ёрдам сўрамоқчи бўлганми, билмадим, ташқарига эгилган шекилли, тушиб кетган ва панжарага тиқилиб қолган.
– Исми нима экан қизалоқнинг?
– Шукрона экан. Ҳақиқий шукрона қиз бўлди энди. Эндигина 4 ёш экан.
Биз “тез ёрдам” чақирдик. Онаси етиб келди. Жуда қўрққан эди, уни ҳам четроққа олиб чиқиб тинчлантирдик. Қўшнилар сув беришди. Роса йиғлади. “Тез ёрдам” қизчани онаси билан олиб кетди. Ортидан биз ҳам бордик. Ҳамма ёғини текширишди, томография, рентген қилишди, ички аъзоларини кўришди. Бошидаги шилинган жойини айтмаса, соппа-соғ экан. Хурсанд бўлиб кетдик.
– Болалар, сизлар ҳамма ишни тўғри қилгансизлар. Таҳликали, “экстренный” вазиятда тезкор тўғри қарорлар қабул қилганинглар учун қизалоқ ҳозир ҳаёт, воқеа яхшилик билан тугади ва сизлар бугун кун қаҳрамони бўлиб яхшилик билан танилдинглар. Бундай вазиятларда нима қилишни сизларга аввал ўргатишганмиди?
– Йўқ, очиғи. Бунақа ҳолатга ҳам биринчи марта тушишимиз. Ўша пайтда миямизга нима келса, қилавердик. Ўйлаб режа қилишга умуман вақт йўқ эди.
– Сизлар лаҳзаларнинг қадрини ҳис қилдинглар. Бир неча дақиқада бир инсоннинг ҳаётини сақлаб қолиш мумкинлигини кўрдинглар. Нимани ҳис қиляпсизлар?
– Яхши иш қилганимиздан, ҳаммаси яхшилик билан тугаганидан хурсандмиз. Тенгдошларимизга айтаманки, одамгарчиликни тарк этишмасин. Масалан, биз ҳам балконда осилиб турган қизчани кўриб индамай кетишимиз ё қўрқиб қочиб қолишимиз мумкин эди. Лекин кейин биз қандай яшардик? Ўша пайтда қўлимиздан келганча ёрдам беришга ҳаракат қилганимиз яхши бўлди. Агар доим ҳамма шунақа қилса, қочмаса, бефарқ бўлмаса, ҳаракат қилиб кўрса, атрофимиз, ҳаётимиз нақадар бошқача, тоза ва тўғри бўлишини англадик.
– 11-синфни битираётган экансизлар. Келажак режаларингиз қандай?
– Мен 7 та халқаро университетга муддатидан олдин кирганман. Улар орасида АҚШдаги Ball State University, ўзимиздаги Сингапур халқаро менежментни ривожлантириш университети, Вестминстер, Вебстер университетлари бор. Бекор ўтирмай деб ҳаракат қилиб кириб қўйгандимда. Лекин ё Тошкент давлат иқтисодиёт университети ёки Самарқанд сервис ва иқтисодиёт университетида ўқимоқчиман.
Мурод IELTSдан 6 олган, Хитойнинг бир нечта университетларига кирган, Хитойга кетади. У суратда менинг ёнгинамда, ўнгда турибди.
Унинг ёнидаги, энг четдаги Озодбек юрист бўлмоқчи. Тошкент давлат юридик университетига кириш ниятида.
Чапдаги қора футболкали Жасур мен каби Самарқанд сервис ва иқтисодиёт университетига кирмоқчи.
Хуллас, режаларимиз шундай.
– Режаларингиз рўёбга чиқсин. Бугун сизлар бир умрга татигулик воқеанинг иштирокчиси ва қаҳрамони бўлдинглар. Ҳали келажакда набираларга ҳам ибратли воқеа деб айтиб беришинглар мумкин. Ўзи иштирок этган қаҳрамонлик ҳикоясига эга бўлиш ҳаммага ҳам насиб қилмайди. Сизлар чиндан ҳам омадли инсон экансизлар. Бир умр омад тарк этмасин.
Шаҳноза Соатова суҳбатлашди.