Хабарингиз бор, бундан бир ой олдин Муаллифлик ва турдош ҳуқуқларни ҳимоя қилиш жамоат бирлашмаси томонидан “Насафий” тахаллуси билан ижод қилаётган қўшиқчи Акмалов Азизиддин, Ўзбекистон халқ артисти Шерали Жўраев ижросидаги “Қора кўзли санамжон” номли қўшиғини ва шеърини муаллифнинг розилигисиз асар яхлитлигини бузган ҳолда ижро этиб, уни интернет тармоқларига жойлаштирган ҳолда моддий манфаат кўриб келгани ҳақида Интеллектуал мулк агентлигига мурожаат келиб тушган. Шундан сунг Агентлик мазкур ҳолат юзасидан Маъмурий судга баённома киритган.
Натижада суд Насафийни Маъмурий жавобгарлик тўғрисидаги кодекснинг 177(1)–моддаси 1-қисмида назарда тутилган маъмурий ҳуқуқбузарликни содир қилган деб топиб, базавий ҳисоблаш миқдорининг 3 баравари яъни 669.000 минг сўм миқдорида жарима жазоси тайинлаган.
Шу ўринда қўшиқчини жаримага тортишнинг нима кераги бор, ҳамма бир бирининг қўшиғини айтяпти-ку, деган эътирозлар пайдо бўлиши табиий. Бу борада Интеллектуал мулк агентлиги матбуот котиби Ферузбек Жўраев қуйидагича изоҳ берди:
— Аслида, муаллифлик ҳуқуқи ҳар қандай рухсатсиз фойдаланишдан қонун билан ҳимояланган. Тасаввур қилинг, шахсий автомашинангизни ўзга бир шахс сизнинг рухсатингизсиз фойдаланса ва ундан моддий фойда олса, унга жимгина қараб турмайсиз. Эгалик ҳуқуқингизни талаб қиласиз. Қўшиқ ҳам ҳудди шундай муаллифнинг шахсий мулки ҳисобланади. Кимдур ундан фойдаланса, албатта, мулк шартнома тузиш орқали рухсат олиши керак бўлади.
Маълумот учун хорижий давлатларининг қўшиқчилари орасида ҳам бу каби ҳолатлар учраб туради ва уларга нисбатан катта жарима қўлланилади. Британиялик қўшиқчи George Harrisonнинг қўшиқ куйида “The Chiffons” гуруҳининг қўшиғидаги куй билан ўхшашлик бўлган. Натижада Harrison суд қарори билан 587.000 АҚШ доллари миқдорида жаримага тортилган.
Шу ўринда эслатиб ўтамиз, ўз муаллифлик ҳуқуқи бузилган фуқаролар Интеллектуал мулк агентлигига мурожаат қилишмаса Агентлик бу борада ҳеч қандай чора кўра олмайди. Агар Сизнинг муаллифлик ҳуқуқларингиз бузилаётган бўлса Муаллифлик ва турдош ҳуқуқларни ҳимоя қилиш жамиятига аъзо бўлишингиз ёки тўғридан-тўғри Интеллектуал мулк агентлигининг ☎️71 2325054 ҳамда телеграм ижтимоий тармоғидаги ima_monitoring_bot орқали мурожаат қилишингиз мумкин.