Қувайтнинг "Gulf General Trading Co. Ltd." компанияси Тошкентда замонавий тиббий лаборатория ва реактивлар ишлаб чиқарадиган завод лойиҳасини амалга оширишни режалаштирмоқда.

Тошкент шаҳри Сергели тумани ҳокимлиги ва "Gulf General Trading Co. Ltd." компанияси ўртасида замонавий тиббий лаборатория ташкил этиш ва реагентлар ишлаб чиқарувчи завод лойиҳасини амалга ошириш бўйича ўзаро ҳамкорлик меморандуми имзоланди.

Кувайтдаги музокаралар чоғида Сергели туманига хорижий инвестицияларни жалб қилиш ва замонавий технологияларни олиб келиш, шунингдек, фармацевтика бўйича ишлаб чиқаришни йўлга қўйиш ҳамда "Sergeli Mall" савдо мажмуаси лойиҳаси амалга ошириш бўйича таклифлар муҳокама қилинди.

Инвестор Ияд Солиҳ тиббиёт, логистика ва инфратузилма соҳаларига сармоя киритишга қизиқиш билдирди. Хусусан, Ияд Солиҳ томонидан Сергели туманида жойлашган давлат тиббиёт муассасаларини замонавий тиббиёт анжомлари билан жиҳозлаш, дунёдаги сўнгги технологиялар асосида касалликни эрта аниқлаш ва ташхис қўйиш технологияларини олиб кириш бўйича режаларини маълум қилди.