Ўзбекистонда топ-20 йирик солиқ тўловчилар маълум қилинди. Хабар берилишича, 2024 йил январь-апрель ойларида 2 187 та йирик солиқ тўловчи томонидан 32,9 триллион сўмдан ортиқ солиқ тушумлари амалга оширилди.

Шундан 16,2 триллион сўми давлат улуши мавжуд топ-10 та йирик солиқ тўловчи ҳисобига тўғи келади. Ушбу ўнликда солиқ тўловлари бўйича “Навоий конь металлургия комбинати” етакчилик қилмоқда –7,7 триллион сўмдан зиёд.

2,5 триллион сўмдан зиёдроғи хусусий сектордаги топ-10 йирик солиқ тўловчилар ҳисобига тўғри келади. Мазкур рейтингда “Уз БАТ” – 843 миллиард сўм солиқ тушумларини амалга оширган ҳолда энг юқори кўрсаткич қайд этган.

Аввалроқ қурилиш фаолияти билан шуғулланувчи 33 090 та юридик шахс томонидан 2024-ҳ йил январь-март ойларида 2,1 трлн сўмдан ортиқ солиқ тўлагани ҳақида хабар берилганди.

Шундан 262,8 млрд сўми, яъни 12,1 фоизи 20 та корхона ҳисобига тўғри келган. Маълумот учун, ушбу солиқ тўловчилар томонидан таъминланган тушумлар солиқ турлари кесимида ажратиб ҳисоблаб чиқилган эди:

1. ҚҚС - 133,4 млрд сўм;
2. ЖШОДС - 41,6 млрд сўм;
3. фойда солиғи - 40,8 млрд сўм;
4. ижтимоий солиқ - 32,6 млрд сўм;
5. мол-мулк солиғи - 8,8 млрд сўм;
6. ер солиғи - 5,2 млрд сўм;
7. бошқа солиқлар - 0,3 млрд сўм.

Шунингдек, ишлаб чиқариш фаолияти билан шуғулланувчи 65 204 та юридик шахс томонидан 2024 йилнинг январь-март ойларида 8,6 трлн сўмдан зиёд солиқ тўлангани ҳақида ҳам маълумотлар берилганди. Шундан 3,4 трлн сўми 20 та солиқ тўловчи ҳисобига тўғри келади.