— Уч нафар қизмиз. Ҳаммамиз Россияда ишлаган пайтимизда, отам вафот этди. Ундан квартира, дала ҳовли ва машина гаражи билан қолди. Биз кичик синглим билан келолмадик, уч ойдан сўнг ўртанча синглим Ўзбекистонга келиб, отамнинг квартирасига жойлашди. Орадан 6 ой ўтиб, мен кичик синглимдан ишончнома олиб келдим. Отамдан қолган уй эшигини тақиллатсам, синглим очмади, участка инспектори ва маҳаллани чақириб, уй унга тегишлилигини айтиб, жанжал қиляпти. Ҳужжатларини кўрсатди. 3 март куни ҳамма мулкни ўзига расмийлаштириб олибди. 8 март куни 6 ой тўлган, энди биз меросдан ўзимизга тегишлисини ололмаймизми?
— Фуқаролик кодексининг 1135-моддасига кўра 3 нафар қиз биринчи навбатдаги меросхўрлар доирасига кирасизлар ва отангизнинг номидаги мерос мол-мулкка тенг ҳиссада меросхўрлар ҳисобланасизлар. Сиз нотариусга бориб, мерос мол-мулки қандай ҳужжатга асосан синглингизнинг номига расмийлаштирилганлигини билиб олишингиз шарт. Шундан кейин фуқаролик судига мурожаат килиб, ушбу ҳужжатни бекор қилдиришингиз мумкин.
Агарда отангиз томонидан васиятнома қолдирилган бўлса, мерос гувоҳномаси васиятномага асосан берилиши мумкин. Сизлар мажбурий равишда улушга эга бўлган меросхўрлар доирасига кирмасангиз (ногирон ёки меҳнатга лаёқатсиз) васиятнома бўйича меросга бўлган ҳуқуқ тўғрисида гувоҳнома сизнинг иштирокингизсиз берилиши мумкин.
Саволга Мирзаобод туманида хусусий амалиёт билан шуғулланувчи нотариус Нурбек Эгамбердиев жавоб берди.