Судланганлик шахснинг содир этган жинояти учун ҳукм этилганлигидан келиб чиқадиган ҳуқуқий ҳолатдир.
Жазо тайинланган айблов ҳукми қонуний кучга кирган кундан бошлаб шахс судланган деб ҳисобланади.
Амалдаги жиноят кодексининг 78-моддаси талабига кўра қуйидаги муддатларда шахснинг судланганлик ҳолати тугатилади;
— шартли ҳукм қилинганларга нисбатан — синов муддати тугаган кундан бошлаб;
— мажбурий жамоат ишлари, хизмат бўйича чеклаш ёки интизомий қисмга жўнатиш тарзидаги жазоларини ўтаб чиққач;
— жарима жазоси ижро этилган кундан кейин, шунингдек муайян ҳуқуқдан маҳрум қилиш ёки ахлоқ тузатиш ишлари жазолари ўталганидан кейин 1 йил ўтгач;
— озодликни чеклаш жазоси ўталганидан кейин — 2 йил ўтгач;
— беш йилдан кўп бўлмаган муддатга озодликдан маҳрум қилиш жазоси ўталганидан кейин — 4 йил ўтгач;
— беш йилдан ортиқ, лекин ўн йилдан кўп бўлмаган муддатга озодликдан маҳрум қилиш жазоси ўталганидан кейин — 7 йил ўтгач;
— ўн йилдан ортиқ, лекин ўн беш йилдан кўп бўлмаган муддатга озодликдан маҳрум қилиш жазоси ўталганидан кейин — 10 йил ўтгач.
Қонунга кўра, судланганлик ҳолати олиб ташланган ёки тугатилган шахс судланмаган ҳисобланади.
Иброҳим Жабборов,
жиноят ишлари бўйича Чуст туман суди судьяси