Ҳалолик йўқ жойда дангасалик, текинхўрлик иллати пайдо бўлади. Одам боласи ҳалол меҳнат қилиш ўрнига пешона тери тўкмасдан, бошқалар ҳисобига кун кўришга ўрганиб қолса ёмон экан. Бу тоифа шахсларнинг кимларгадир зарари тегиб, тўқликка шўхлик қилиб жиноятга қўл уришдан тап тортмайди.
Жиноят ишлари бўйича Яшнобод туман судининг қора курсисида мулзам ҳолда ўтирган ёшларни кўрган киши борки, умр заволи шу бўлса керак, деган фикрга борса ажабмас. Бири эндигина 20 ёшни, иккинчиси 30 ёшни қаршилаган йигит-қизни биргалашиб қинғирлик қилгани хаёлга минг бир фикрларни солади. Текинхўрлик кайфиятида босқинчилик, товламачилик жиноятига қўл ўргани ташвишли ҳол, албатта.
Жиноятнинг катта-кичиги ва оғир-енгили бўлмайди. Шундай дейишга деймизу, лекин баъзан жиноятга қўл урган кимсалар ҳақида эшитганимизда, «Ҳа, энди беш қўл баробар эмасда», деб қўямиз. Аслида бундай кўникиш кайфияти билан жиноятчиликни жиловлаб бўлмаслигини ўйлаб кўрмаймиз.
Фикримиз бироз чўзилди, келинг суднинг қора курсисида ўтирган йигит ва қиз қилмишининг айрим тафсилотларига тўхтала қолайлик. Фотима (исмлар ўзгартирилган) ҳали турмушга чиқмаган, лекин бир нафар фарзанди бор. Тўрабек эса 30 ёшга кириб ҳам ақл топмаган экан. Гап шундаки, кунларнинг бирида Фотима холасининг ўғли Тўрабекка ҳасрат қилади. Танишган йигити билан бор- йўғи 4 ой яшаганини, энди ортиқ у билан ҳаёт кечимаслигини айтади. Фотиманинг таннозлигини қарангки, ўша йигити Арслондан ажралаётган вақтида 3 минг АҚШ долларини олгани ҳақида аввалига лом-мим демайди. Аксинча, холаваччасига Арслоннинг ёнида доим кўп пул юришини айтади. Техинхўрлик кайфиятида ўзича режалар туза бошлашади. Пала-партиш, хомхаёлдан завқланган Тўрабек дарҳол унга телефон қилиб учрашувга чақиради. Бошига не савдолар тушишини хаёлига ҳам келтирмаган Арслон улар билан кўришади. Йўл четида тўхтаган «Ласетти»га Тўрабек билан Фотима ўтириб олади. Ҳайдовчи Арслон эканлигини билган Тўрабек мақсадга кўчади. Унга пичоқ тираб кўздан пана жойга ҳайдашини талаб қилади. Йўл-йўлакай бўлардан қандай қутилишни ўйлаб кетаётган Арслоннинг кўзи ҳарбийларга тушади. Уларнинг ёнига яқинлашиб, машинасини тўхтатади-да, сакраб тушиб қочиб қолади. Бундай бўлишини кутмаган Тўрабек машинани ўзи ҳайдаб кетади. Ортидан ҳеч ким қувиб келмаётганига ишонч ҳосил қилгандан кейин йўл четида тўхтайди. Машинани титиб яшириб қўйилган 2 миллион сўм пулни топиб олади. Кейин Арслонга қўнғироқ қилиб, Фотима ундан ҳомиладор эканлигини айтиб, 100 минг АҚШ доллари бериш шартини қўяди. Айтилган пулни берса, сир сирлигича қолишини айтади. Акс ҳолда машинасини ёқиб юборишини айтиб қўрқитишга уринади.
Содир этилган жиноятнинг қисқача мазмуни шундан иборат. Лекин уни ажабланарли, айниқса, мулоҳазага ундайдиган жиҳатлари талайгина. Фотима билан Тўрабекнинг қилмишини таҳлил қилар экансиз, қатор-қатор саволлар чиқаверади. Хулосалар турлича бўлиши мумкин. Бироқ жиноятчиликни жиловлаш масаласи долзарб бўлган бугунги кунда жиноятчиликнинг туб илдизлари инсон маънавиятига бориб тақалади. Шундай экан биз доим маънавий дунёқарашимизни бойитиб бораверишимиз керак.
Аброр САИДОВ,
жиноят ишлари бўйича Яшнобод туман суди раиси