Кейинги йилларда суд экспертлик фаолиятини ривожлантиришга алоҳида эътибор қаратилиб, бир қатор норматив ҳуқуқий ҳужжатлар қабул қилинди. Суд экспертиза муассасаларининг моддий техника базасини мустаҳкамлаш, суд-экспертлик фаолиятига ахборот-коммуникация технологияларини жорий қилиш, суд-экспертлик амалиётига янги инновацион ишланмаларни жорий этиш, суд экспертизаларининг турларини кенгайтириш, уларнинг сифати ва ишончлилигини ошириш ҳамда соҳада халқаро ҳамкорликни ривожлантириш бўйича чоралар кўрилди.
Шу билан бирга, амалиётда илк бор нодавлат ташкилотлар томонидан суд-экспертлик фаолиятини амалга оширишнинг ҳуқуқий асослари яратилди.
Жорий йилнинг 27 май куни Ўзбекистон Республикаси Адлия вазирлигида республиканинг барча суд экспертиза муассасалари, судлар, адвокатлар, олий таълим муассасалари ва ҳуқуқни муҳофаза қилувчи органларнинг вакиллари иштирокида ўтказилган давра суҳбатида, эришилган натижалар билан бирга, соҳадаги муаммолар ва уларнинг ечимлари бўйича фикр алмашилмоқда.
Тадбирда суд экспертиза муассасалари томонидан суд-тергов органлари қарорлари (ажримлари) ҳамда юридик ва жисмоний шахсларнинг мурожаатлари асосида тадқиқотлар ўтказилиб, экспертиза хулосалари берилганлиги, ушбу тадқиқотлар республикадаги жиноятчиликни фош этиш, одил судловни амалга ошириш ҳамда инсонларнинг ҳуқуқ ва манфаатларини ҳимоя қилишда муҳим роль ўйнаганлиги таъкидланди.
Суд экспертиза муассасалари нафақат суд экспертиза тадқиқотларини амалга ошириш, балки янги услубиётлар ҳамда янги экспертиза турларини жорий этиш бўйича кенг кўламли илмий ишларни амалга оширганликларига урғу берилиб, Суд лингвистика экспертизаси, Суд компьютер-техник экспертизаси, Суд автомобиль-йўллари экспертизаси, Суд электротехника экспертизаси, Озиқ-овқат маҳсулотлари суд экспертизаси, Суд психологик экспертизаси ва бошқа янги экспертиза турлари яратилиб, суд-экспертлик жараёнига татбиқ этилганлиги эътироф этилди.
Шу билан бирга, нодавлат ташкилотлар томонидан суд-экспертлик фаолиятини амалга оширишига рухсат берилиши билан соҳадаги қонунчилик янада такомиллаштирилиши лозимлиги ҳамда суд экспертиза йўналишида илмий ишлар билан шуғулланувчи махсус муассаса ташкил этилиши суд экспертлик соҳасининг ривожига хизмат қилиши қайд этилди.
Бундан ташқари, суд экспертиза соҳасига ахборот-коммуникация технологияларини, тегишли ахборот қидирув тизимларини жорий этиш, ушбу тизимларга судлар ва ҳуқуқни муҳофаза қилувчи органларни интеграция қилиш натижасида судлар, ҳуқуқни муҳофаза қилувчи органлар ва суд экспертиза муассасаларининг ўзаро ҳужжат айланишида ҳамда унинг хавфсизлигини таъминлашда ижобий натижаларга эришилиши, суд экспертларининг иш жараёнини енгиллаштириши, ортиқча вақт ва қоғозбозликнинг олди олиниши, натижада эксперт ходимларга янада кўпроқ экспертиза тадқиқотларини олиб боришига ҳамда илмий ишлар билан шуғулланишига имкон яратилиши ҳақида тўхталиб ўтилди.
Тадбир иштирокчиларнинг суд-экспертиза фаолиятига оид барча саволларига суд экспертиза муассасалари вакиллари томонидан тўлиқ жавоб берилмоқда.
Тадбир якунида соҳадаги мавжуд муаммоларни бартараф этиш юзасидан ҳамкорликни амалга оширишга келишиб олинди.
Адлия вазирлиги Жамоатчилик билан алоқалар бўлими