Ўзбекистон иқтисоди энг тез ривожланаётган Осиё давлатлари ўнталигига кирди. Бу ҳақда Yahoo Finance хабар бермоқда.
Халқаро валюта жамғармаси маълумотларига кўра, 2023 йилда республикада иқтисодий ўсиш 4,7 фоизни ташкил этади. Манбанинг қайд этишича, инфляция даражаси меъёрдан юқори бўлишига қарамай, мамлакат пул ўтказмалари ҳажмининг ошиши ва мустаҳкам савдодан фойда кўрган. Ноябрь ойида Халқаро валюта жамғармаси мамлакат иқтисодиёти 2022 йилда тахминан 6 фоизга ўсиши мумкинлигини тахмин қилган эди.
Эслатиб ўтамиз, 2022 йилда Ўзбекистонда пул ўтказмалари ҳажми 16,9 миллиард долларни ташкил этди, бу ўтган йилга нисбатан 2,1 баробар кўпдир. Ҳажмнинг асосий улушини Россиядан трансферлар эгаллади. Умуман олганда, йил бошидан буён ўзбекистонликларнинг бу мамлакатга пул ўтказмалари йил давомида уч баробарга ошган ва 14,5 миллиард долларни ташкил қилган.
Рўйхатда Камбоджа етакчилик қилди. Халқаро валюта жамғармаси мамлакат иқтисодиёти 2023 йилда 6,2 фоизга ўсишини башорат қилмоқда. Ветнам 6,2% билан рўйхатда иккинчи ўринни эгаллади. Учинчи ўринни Ҳиндистон эгаллади – 6,1%. Кейин Малдив ороллари ва Бангладеш – мос равишда 6,1% ва 6%. Қўшни давлатлар орасида Қозоғистон ҳам рейтингдан жой олди ва 13-ўринни эгаллади. Ушбу республикада иқтисодий ўсиш 4,4% даражасида кутилмоқда. Халқаро валюта жамғармаси Хитой учун ҳам худди шундай кўрсаткични башорат қилмоқда.