Жаҳонгир Ортиқхўжаевни Олий Мажлиси Сенати аъзолари рўйхатидан чиқариш тўғрисида Марказий сайлов комиссиясининг қарори эълон қилинди.
Унга кўра, Тошкент шаҳридан сайланган Ўзбекистон Республикаси Олий Мажлиси Сенати аъзоси Жаҳонгир Ортиқхўжаевнинг Халқ депутатлари Тошкент шаҳар Кенгаши депутати сифатида ваколатлари муддатидан илгари тугатилганлиги муносабати билан ҳамда Сенат аъзоси сифатида ўз ваколатларини зиммасидан соқит қилиш ҳақида берган ёзма аризасига мувофиқ унинг сенаторлик ваколати муддатидан илгари тугатилган деб ҳисобланди.
Жаҳонгир Ортиқхўжаев Олий Мажлис Сенати аъзолари рўйхатидан чиқарилди.
Сенатор ваколати қуйидаги ҳолларда муддатидан илгари тугатилади:
🔸 у хоҳишига кўра ёзма ариза берганда;
🔸 сенаторликни амалга оширишига номувофиқ лавозимга сайланган ёки тайинланганда;
🔸 суднинг айблов ҳукми қонуний кучга кирганда;
🔸 у чақириб олинганда (чақириб олиш асослари бу ерда);
🔸 суд уни муомалага лаёқатсиз деб топганда;
🔸 суд қарори билан бедарак йўқолган ёки вафот этган деб эълон қилинганда;
🔸 Ўзбекистон фуқаролигини йўқотганда;
🔸 вафот этганда;
🔸 палата тарқатиб юборилганда.
Халқ депутатлари Кенгашининг сенатор этиб сайланган депутати ваколати муддатидан илгари тугатилса, унинг сенаторлик ваколатлари ҳам тугатилади.
Сенатор деган юксак номга доғ туширувчи хулқ-атвор Сенат томонидан сенатор ваколатини тугатишга асос бўлиши мумкин.