Қандай тоифадаги хотин-қизларнинг контракт пулларини давлат тўлаб беради? Кимга, қачон мурожаат қилиш керак? Hudud24.uz бакалавр босқичида ўқиётган айрим тоифадаги хотин-қизларнинг контракт пулларини давлат томонидан тўлаб бериш тартиби ҳақида маълумот беради.

1. Қандай тоифадаги хотин-қизларнинг контракти давлат томонидан тўлаб берилади?

Ижтимоий эҳтиёжманд оила вакиллари, етим ёки ота-онасининг қарамоғидан маҳрум бўлган хотин-қизлар давлат ОТМлари бакалавр босқичида контракт асосида ўқиганида уларнинг контракт тўловлари ҳокимликлар томонидан тўлаб берилади. Магистратурада ўқиётган барча хотин-қизлар контракти тўлаб берилади, бу ҳақида навбатдаги мақолаларимизда батафсил маълумот берилади.

2. Хусусий университетда ўқиётган хотин-қизлар контракти ҳам тўлаб бериладими?

Йўқ, иккинчи мутахассисликда ёки Ўзбекистондаги хорижий, хусусий ОТМларда ўқиётган хотин-қизларнинг контракти тўлаб берилмайди. Шунингдек, контракти тўлаб бериладиган хотин-қизларлар сони чекланган ва бу ижтимоий мезонлар асосида аниқланади. Бунда ҳар бир вилоятдан жами 150 нафар хотин-қизлар контракти тўлаб берилади, уларнинг 40 таси 1-курс учун, 100 таси 2- ва ундан юқори курс учун.

3. Хотин-қизлар қандай мезонлар асосида аниқланади?

Контракти тўлаб бериладиган хотин-қизлар қуйидаги мезонлар асосида танлаб олинади: а) “Ижтимоий ҳимоя ягона реестри”да кам таъминланган деб эътироф этилган оилалардаги хотин-қизлар; б) етим ёки ота-онасининг қарамоғидан маҳрум бўлган талаба хотин-қизлар; в) боқувчисини йўқотган (турмуш ўртоғи вафот этган), вояга етмаган фарзандларни ёлғиз тарбиялаётган эҳтиёжманд аёллар.

4. Кимга, қачон мурожаат қилиш керак?

Хотин-қизлар контрактини тўлаш учун аризани “мандат” эълон қилинган кундан бошлаб аризани 10 кун ичида ОТМ қабул комиссиясига бериши керак. Ҳозир ариза беришнинг айни вақти. Аризага ҳеч қандай ҳужжатларни илова қилиш шарт эмас, керакли ҳужжатларни ОТМ қабул комиссияси элеткрон шаклда ўзи олади. Қабул комиссияси хотин-қизлар рўйхатини шакллантириб 5 кунда Олий таълим, фан ва инновациялар вазирлигига юборади. Вазирлик 5 кунда рўйхатни ўрганиб чиқиб, хотин-қизларнинг яшаш жойларидаги ҳокимликларга юборади Ҳокимликлар хотин-қизларни танлаб олиш учун комиссия тузади (намунавий рўйхат бу ерда). Комиссия 5 кунда рўйхатдаги ҳар бир хотин-қизларнинг яшаш жойига бориб шароитини ўрганади. Комиссия қуйидагилар асосида рўйхатдан 150 кишини танлаб олади: ўрганиш натижасига кўра аниқланган маълумотлар; хотин-қизларнинг ўқишга киришда тўплаган баллари; ҳудудлардаги (туман (шаҳарлар)лардаги) кадрларга бўлган эҳтиёж; хотин-қизлар ўқиётган курси (курснинг нима аҳамияти бор деган савол бўлиши мумкин, сабаби 1-курсларга 40 та квота ажратилган, қолган квота юқори курсларга). Саралаб олинган 150 нафар хотин-қизлар рўйхати Оила ва хотин-қизлар қўмитасига юборилади ҳамда қўмита 10 кунда тавсиянома тасдиқлаб ҳокимликларга қайта юборади.

5. Ўқишдан ҳайдалса нима бўлади?

Хотин-қизлар ўқиш жойини ёки таълим йўналишини ўзгартирса, шунингдек талабалар сафидан четлаштирилса, контракт бўйича имтиёз бекор қилинади. Ҳокимликлар танлаб олинган хотин-қизларнинг контрактини ҳар чорак якунигача 4 га бўлиб тўлаб беради. Хотин-қизлар комиссия фаолиятидан норози бўлса, судга мурожаат қилиши мумкин.