Бразилия президенти Украина бўйича БМТ саммитини ўтказишни таклиф қилди. Ушбу учрашувга Россия ва Украина президентлари Владимир Путин ва Володимир Зеленскийни таклиф қилиш кераклигини айтди. Бразилия президенти Луиз Инасиу Лула да Силва сентябрда бўладиган жаҳон ташкилотининг юқори даражадаги ҳафталигидан олдин Украинадаги вазият бўйича БМТ саммитини ўтказиш зарур, деб ҳисоблайди. Бу ҳақда у душанба куни бўлиб ўтган матбуот анжуманида айтиб ўтди. "Украинадаги урушни БМТда муҳокама қилиш керак. Президентлик давримнинг беш ойида мени ҳеч ким БМТда ушбу урушни муҳокама қилиш учун йиғилишга таклиф қилмаган. Биз урушни муҳокама қилиш ва тинчликка эришиш учун сентябрда ўтадиган Бош Aссамблея йиғилишини июн-июлга кўчиришимиз мумкин", деди у. Унинг фикрича, Россия ва Украина президентлари Владимир Путин ва Володимир Зеленскийни бундай тадбирга таклиф қилиш керак, шундан сўнг тегишли муҳокамани ўтказиш мақсадга мувофиқ бўларди. Лула да Силванинг сўзларига кўра, Украинадаги вазиятни Г7 форматида ҳам, Г20 форматида ҳам муҳокама қилиш ноўрин ва унинг нуқтаи назари бўйича, БМТ Хавфсизлик Кенгашида бундай муҳокамани ўтказиш энг тўғри йўл бўлади. Aввалроқ Бразилия президенти Россия бутун дунёда узоқ муддатли тинчлик кафолати эканини таъкидлаганди. У Москва ва Киев ўртасида мулоқот учун имконият яратиш учун янги халқаро форматни ишлаб чиқиш бўйича ташаббус билан чиқиб, агар керак бўлса, Россия ва Украина президентлари ўртасидаги тўғридан-тўғри музокараларда воситачилик қилишга тайёрлигини маълум қилди.