Товарлар ва (ёки) транспорт воситалари божхона ҳудудига олиб кирилаётганда ташувчи божхона органини божхона чегарасини кесиб ўтишидан хабардор қилиши шарт.

Ташувчи ёки бошқа манфаатдор шахс товарлар ва (ёки) транспорт воситалари божхона ҳудудига амалда етиб келгунига қадар улар тўғрисида божхона органига дастлабки ахборотни тақдим этишга ҳақли.

Товарларни ва (ёки) транспорт воситаларини бевосита божхона чегараси орқали олиб ўтишга қаратилган ҳаракатлар қуйидагилар:

• божхона чегарасини кесиб ўтаётган жисмоний шахснинг божхона назорати зонасига кириши;
   
• транспорт воситасининг божхона чегарасини кесиб ўтиш мақсадида Ўзбекистон Республикаси Давлат чегарасидан ўтказиш пунктига кириши;
   
• божхона ҳудудига йўллаш ёки ушбу ҳудуддан ташқарига жўнатиш учун товарларни транспорт ташкилотларига ёхуд халқаро почта ва курьерлик жўнатмаларини почта алоқаси операторлари ва провайдерларига топшириш;
   
• жисмоний шахснинг қонун ҳужжатларига мувофиқ белгиланмаган жойлардан товарлар ва (ёки) транспорт воситалари билан божхона чегарасини амалда кесиб ўтишга қаратилган ҳаракатлари.

Ўзбекистон Республикасининг “Жисмоний шахслар томонидан божхона чегараси орқали товарларни олиб ўтишни янада тартибга солиш чора-тадбирлари тўғрисида”ги 3512-сонли қарорига кўра, қуйидаги маҳсулотлар божхона чегарасидан бож тўловларисиз олиб чиқиши мумкин:

- Алкогол маҳсулоти, шу жумладан, пиво — умумий миқдори 2 литрдан кўп бўлмаган;

- тамаки маҳсулотларининг барча турлари — умумий миқдори 10 қутидан кўп бўлмаган;

- атир ва ифор таратувчи сувлар — умумий миқдори 3 тадан кўп бўлмаган;

- қимматбаҳо металлар ва қимматбаҳо тошлардан заргарлик буюмлари — умумий оғирлиги 65 граммдан кўп бўлмаган;

- гуруч — умумий оғирлиги 3 кг дан кўп бўлмаган;

- нон-булка маҳсулотлари — умумий оғирлиги 5 кг дан кўп бўлмаган;

- гўшт ва гўшт озиқ-овқат маҳсулотлари — умумий оғирлиги 2 кг дан кўп бўлмаган;

- шакар — умумий оғирлиги 2 кг дан кўп бўлмаган;

- ўсимлик мойлари — умумий оғирлиги 2 кг дан кўп бўлмаган;

- янги узилган мева-сабзавот маҳсулотлари, узум, полиз экинлари, дуккакли ўсимликлари ҳамда қуритилган сабзавот ва мевалар — умумий оғирлиги 40 кг.дан кўп бўлмаган миқдорда.