Хотин-қизларга бериладиган кредитлар тадбиркорлик қилиш, уй-жойга эга бўлиш ва бирор касбни эгаллаш учун янги имкониятлар эшигини очади. Аммо бундай имтёзли кредитлар борлигидан кўплаб хотин-қизлар бехабар. Улар қаерга, қандай мурожаат қилишни, кредитни қандай олишни билмайди. Hudud24.uz бугун эҳтиёжманд хотин-қизларга имтиёзли кредитлар ҳақида муҳим маълумотларни тақдим этади.

1. Оилавий тадбиркорликни ташкил этиш учун тижорат банки кредити 

Кредит тадбиркорлик қилиш истагида бўлган эҳтиёжманд хотин-қизларга берилади. Миқдори 33 миллион сўмгача. Кредитни олиш учун Халқ банки, Агробанк, Микрокредитбанкка мурожаат қилиш керак. Эҳтиёжманд хотин-қизларга ушбу кредитни олиш учун ҳоким ёрдамчиси кўмаклашади.

2. Тадбиркорлик фаолиятини йўлга қўйиш учун кредит 

Тадбиркорлик қилиш истагида бўлган эҳтиёжманд хотин-қизларга берилади. Кредит 33 миллион сўмгача берилади. Бу кредитни олиш учун Оила ва хотин-қизлар давлат қўмитасига мурожаат қилиш керак, кредит ажратилишида аёлларга ҳоким ёрдамчиси кўмаклашади.

3. Ипотека кредити бўйича бошланғич бадал тўлаб берилади

Бу имтиёз уй-жойга муҳтож эҳтиёжманд хотин-қизлар учун. Бошланғич бадал уй-жой қийматининг 10-15 фоизи ёки 32 миллион сўм миқдорида тўланади. Ипотека кредитининг бошланғич бадалини тўлаб беришни сўраб Оила ва хотин-қизлар давлат қўмитаси, Туман (шаҳар) ҳокимлиги, Адлия вазирлиги ёки Ягона интерактив давлат хизматлари порталига мурожаат қилинади. Бунинг учун аёлларга хотин-қизлар фаоли кўмаклашади.

4. Деҳқончилик, фермерлик, иссиқхона учун кредит

Кредит енгил конструкцияли иссиқхоналар ўрнатиш, парранда, асалари, қуён, балиқ ва бедана боқишни йўлга қўйиш, деҳқончилик билан шуғулланиш, қишлоқ хўжалиги маҳсулотларини етиштириш, қайта ишлаш, сақлаш ва сотиш ишларини ташкил этиш, “Томорқа хизмати” ташкилотлари ва “Дала дўконлари”ни ташкил этиш учун ажратилади. Ушбу кредит тури қарамоғида ногиронлиги бўлган фарзанди мавжуд эҳтиёжманд хотин-қизларга берилади. Миқдори жисмоний шахсларга 33 миллион сўмгача, фермер, деҳқон хўжаликлари ва бошқа тадбиркорлик субъектларига 225 миллион сўмгача, фермер, деҳқон хўжаликлари ва бошқа тадбиркорлик субъектларига 225 миллион сўмдан юқори. Кредит олиш учун Фермер, деҳқон хўжаликлари ва томорқа ер эгалари кенгашига мурожаат қилиш керак. Аёлларга ҳоким ёрдамчиси ва Ҳудудий фермер, деҳқон хўжаликлари ва томорқа ер эгалари кенгаши кўмаклашади.

5. Имтиёзли таълим кредити берилади

Имтиёзли таълим кредити Олий, ўрта махсус ва профессионал таълим ташкилотларида таълим олаётган хотин-қизларга берилади. Кредит фоизи Жамғарма томонидан қоплаб берилади. Кредит ўқиш тугаганидан сўнг еттинчи ойдан бошлаб 7 йил давомида тўлаб борилади. Имтиёзли таълим кредити ажратилиши мумкин бўлган ҳар қандай банкка мурожаат қилиш мумкин. Агарда банклар ушбу кредитларни ажратишдан бош тортса, албатта, нима асосда рад этилаётганини сўраш ва ёзма шаклда жавоб беришларини талаб қилиш керак. Агар ушбу мурожаатга жавоб берилмаса ёки жавоб беришдан бош тортишса, ҳуқуқни муҳофаза қилувчи органларга (адлия, прокуратура ва ички ишлар) мурожаат қилиш зарур. Шунингдек, банкларда хотин-қизлар учун алоҳида имтиёзли кредитлаш тизими ҳам мавжуд бўлиши мумкин.

Саламат Туремуратов,

hudud24.uz колумнисти