20 февраль куни Инсон ҳуқуқлари бўйича Ўзбекистон Республикаси Миллий марказида “Инсон ҳуқуқлари соҳасида таълим ва тадқиқотлар” танлови ғолибларини тақдирлашга бағишланган тантанали маросим бўлиб ўтди. Ушбу тадбир мамлакатимизда 20 февралдан – 28 февралга қадар давом этадиган “Инсон ҳуқуқлари ҳафталиги” доирасида ташкил этилди. Инсон ҳуқуқлари бўйича Ўзбекистон Республикаси Миллий маркази директори Акмал Саидов  маросимни очар экан, айни мавзудаги республика танлови Миллий марказ томонидан 2022 йил 10 октябрь куни эълон қилингани ва бир ой давом этганига эътиборни қаратди. Танлов Ўзбекистон Республикаси Конституцияси қабул қилинганининг 30 йиллиги, БМТнинг Инсон ҳуқуқлари соҳасидаги Жаҳон таълим дастури ҳамда Инсон ҳуқуқлари соҳасида таълим ва тарбия тўғрисидаги декларациясига бағишланди. Танлов Европада Хавфсизлик ва ҳамкорлик ташкилоти ҳамда  БМТнинг Наркотиклар ва жиноятчиликка қарши кураш бўйича бошқармаси билан яқин ҳамкорликда ташкил этилди. Уни ўтказишдан мақсади инсон ҳуқуқлари соҳасидаги таълим ва тадқиқотларни қўллаб-қувватлаш, мамлакатимиз аҳолиси ўртасида инсон ҳуқуқлари маданиятини кенг тарғиб этишдир. Танлов 5 номинация бўйича ўтказилиб, жами 72 та  ҳужжат келиб тушди.  Танлов якунларига кўра, 1-ўринга:

• “Инсон ҳуқуқлари бўйича энг яхши ўқув курси” номинацияси бўйича – Юристлар малакасини ошириш маркази Бош мутахассиси Сардор Абдиҳаликов;

• “Исон ҳуқуқлари – болалар нигоҳида” номинацияси бўйича – Тошкент шаҳар Мирзо Улуғбек тумани 50-ўрта мактабининг 7 “Ж”-синф ўқувчиси Фарангиз Азиззода;
• “Инсон ҳуқуқлари ва эркинликларига бағишланган энг яхши видеоролик” номинацияси бўйича – Қорақалпоғистон мусулмонлари қозиёти ахборот-медиа мутахассиси  Нурмуҳаммед Жумағулов;
• “Инсон ҳуқуқлари ва эркинликларига бағишланган энг яхши ўқув адабиёти” номинацияси бўйича – Мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институтининг “Ижтимоий фанлар” кафедраси мудири, сиёсий фанлар бўйича фалсафа доктори, доцент Шуҳрат Отақулов;

“Инсон ҳуқуқлари бўйича энг яхши мақола” номинацияси бўйича – Ўзбекистон Республикаси Фанлар академияси Давлат ва ҳуқуқ институти мустақил изланувчиси Одил Бўриев муносиб деб топилди. Ғолиблар  1-даражали диплом ва қимматбаҳо совғалар билан мукофотландилар.