Ўзбекистон Республикаси Меҳнат кодексининг 130-моддасида дастлабки синов муддати белгилаб қўйилган.

Дастлабки синов муддати уч ойдан, ташкилотларнинг раҳбарлари ва уларнинг ўринбосарлари, бош бухгалтерлар ҳамда ташкилотлар алоҳида бўлинмаларининг раҳбарлари учун эса олти ойдан ошмаслиги керак.

Вақтинча меҳнатга қобилиятсизлик даври ва ходим ҳақиқатда ишда бўлмаган бошқа даврлар дастлабки синов муддатига қўшилмайди.

Ўзбекистон Республикаси Меҳнат кодексининг 129-моддасига биноан, қуйидаги шахслар ишга қабул қилинганда дастлабки синов белгиланмайди:

— ҳомиладор аёл, 3 ёшга тўлмаган боласи бор аёл ёки 3 ёшга тўлмаган болани ёлғиз ўзи тарбиялаётган ота (васий);

— захирага қўйиладиган иш ўринларига ишга жойлаштириш учун юборилган аҳолининг ижтимоий эҳтиёжманд тоифаларидан бўлган шахслар;

— давлат грантлари асосида ўқиган ва олий та’лим ташкилотини тамомлаган кундан э’тиборан 3 ой ичида йўлланма бўйича олинган мутахассислигига доир ишга кираётган олий та’лим ташкилотларининг битирувчилари;

— тегишли та’лим ташкилотини тамомлаган кундан э’тиборан 1 йил ичида биринчи бор ишга кираётганда олинган мутахассислиги бўйича мустақил равишда ишга жойлашаётган умумий ўрта, ўрта махсус, профессионал ва олий та’лим ташкилотларининг битирувчилари;

— ўзи билан 6 ойгача муддатга меҳнат шартномаси тузилаётган ходимлар;

— 18 ёшга тўлмаган шахслар;

— ишга қайтадан қабул қилинган тақдирда иш берувчи илгари қайси ходимлар билан меҳнат шартномасини алоҳида асослар бўйича бекор қилган бўлса, ўша шахслар;

— ишлаб чиқаришда ўқитиш шартномаси бўйича ушбу иш берувчида ўқишни ўтаган ўқувчилар;

— жамоа келишувларида, шунингдек жамоа шартномасида ва иш берувчининг ички ҳужжатларида назарда тутилган бошқа ходимлар.