2021 йил 26 январдаги Ўзбекистон Республикаси Марказий банки томонидан қабул қилинган қарорларга кўра, (рўйхат рақами 3285) фуқаролар паспорт билан бирга ID-карта ёки миллий ҳайдовчилик гувоҳномаси орқали ҳам банк хизматларидан фойдаланишлари мумкин. Шунингдек, Президентнинг «Ўзбекистон Республикасида идентификация ID-карталарини жорий этиш чора-тадбирлари тўғрисида»ги фармонига мувофиқ 2021 йилдан бошлаб ID-карталар берилади.

Шу билан бирга, Вазирлар Маҳкамасининг “Ички ишлар органлари тизимида давлат хизматлари кўрсатиш сифатини янада такомиллаштириш ва тартиб-таомилларини соддалаштириш чора-тадбирлари тўғрисида”ги қарори 6-бандига мувофиқ янги намунадаги миллий ҳайдовчилик гувоҳномасига шахсни тасдиқловчи расмий давлат ҳужжати мақоми берилди.   

Қарорга мувофиқ Марказий банк раҳбарияти томонидан қабул қилинган 7 та норматив-ҳуқуқий ҳужжатга ўзгартиришлар киритилди. Унга мувофиқ фуқаролар паспорт билан бир қаторда идентификация ID-карталари ёки миллий ҳайдовчилик гувоҳномаларини кўрсатиб, банк хизматларидан фойдаланишлари мумкин.   

Янги намунадаги миллий ҳайдовчилик гувоҳномаси шахсни тасдиқловчи расмий давлат ҳужжати мақомига эга бўлгани сабабли, у банк хизматларини кўрсатиш жараёнида паспортнинг ўрнини боса олади. Шунингдек, ҳисобварағ очиш, кредит ёки депозит хизматларидан фойдаланиш, банк пластик карталарини расмийлаштириш мумкин.   

Эслатиб ўтамиз, янги намунадаги ҳайдовчилик гувоҳномаси бўлса, банкка ID-карта ёки паспорт олиб бориш шарт эмас.