Адлия вазирлиги қошидаги “Адолат” миллий ҳуқуқий ахборот маркази ва “Дастурхон ТВ” телеканали ўртасида ҳуқуқий материалларни тарқатиш, аҳоли ўртасида ҳуқуқий саводхонликни ошириш мақсадида ҳамкорлик меморандуми имзоланди.

Мазкур йиғилишда "Адолат" МҲАМ маркази директори Акбар Мусаев, "Дастурхон МЕДИА" МЧЖ раҳбари Заур Алиев, медиа марказ ходимлари ҳамда телеканал вакиллари иштирок этишди.

Муҳокамада халқчил ҳуқуқий материаллар тайёрлаш уларни кенг оммага тарқатишда телеканални жалб қилиш борасида сўз борди. Қонунчилик ҳужжатлари мазмум-моҳиятини очиб беришга қаратилган кўрсатувлар тайёрлаш бўйича фикр алмашилди.

Медиа марказ томонидан тақдим этиб келинаётган “Ҳуқуқшунос ошхонаси” кўрсатуви аҳоли учун муҳим ижтимоий-ҳуқуқий саволларга юристлардан жавоб олиш имкониятини яратади.

Ўзаро ҳамкорликда "Дастурхон ТВ" телеканалида "Ҳуқуқшунос ошхонаси" кўрсатувини суратга олишни бошлашга келишиб олинди.