Ўзбекистон Республикасининг Фуқаролик Кодексининг 1142-моддасига асосан, меросдан мажбурий улуш олиш ҳуқуқига қуйидаги шахслар эга:

1. Мерос қолдирувчининг вояга етмаган болалари (шу жумладан фарзандликка олинган болалари);

2. Мерос қолдирувчининг меҳнатга қобилиятсиз болалари (шу жумладан фарзандликка олинган болалари);

3. Мерос қолдирувчининг меҳнатга қобилиятсиз эри (хотини);

4. Мерос қолдирувчининг меҳнатга қобилиятсиз ота-онаси (шу жумладан уни фарзандликка олганлар).

Юқорида санаб ўтилган шахслар, васиятноманинг мазмунидан қатъи назар, қонун бўйича ворис бўлганларида улардан ҳар бирига тегиши лозим бўлган улушнинг камида ярмини (мажбурий улуш) мерос қилиб оладилар.

Мажбурий улуш олиш ҳуқуқига эга бўлган меросхўр бирон-бир асос бўйича меросдан оладиган ҳамма нарса, шу жумладан оддий уй жиҳозлари ва рўзғор буюмларидан иборат мол-мулкнинг қиймати ҳам, бундай меросхўр фойдасига қилинган васият мажбуриятининг қиймати ҳам мажбурий улушга қўшилади.

Меросдан мажбурий улуш олиш ҳуқуқига эга бўлган меросхўр учун васиятномада белгиланган ҳар қандай чеклашлар ва шартлар унга тегадиган мероснинг мажбурий улушдан ортиқча қисмига нисбатангина ҳақиқийдир.

Ўзбекистон Республикаси Олий суди Пленумининг 2011 йил 20 июлдаги 05-сонли қарорига кўра, тақдим қилиш ҳуқуқи бўйича меросхўрлар, мерос қолдирувчининг меҳнатга қобилиятсиз боқимлари, иккинчи ва ундан кейинги навбатдаги ворислар мажбурий улуш олиш ҳуқуқига эга эмас.