Ушбу материалда гиёҳванд моддалар билан ноқонуний шуғулланувчилар учун қонун доирасида қандай жазолар борлиги билан танишиш мумкин.

Ўзбекистонда гиёҳвандлик воситалари, уларнинг аналоглари ёки психотроп моддаларнинг телекоммуникация ва интернет тармоқларидан фойдаланган ҳолда ноқонуний айлантирганлик учун жавобгарлик чоралари мавжуд. Бундан ташқари, гиёҳвандлик воситалари, уларнинг аналоглари ёки психотроп моддалар, кучли таъсир қилувчи ва заҳарли моддаларни ўтказиш мақсадини кўзламай қонунга хилоф равишда олганлик, сақлаганлик, ташиганлик ёки жўнатганлик учун маъмурий ва жиноий жавобгарлик белгилаб қўйилган.

Маъмурий жавобгарлик тўғрисидаги кодекснинг 56 (2)-моддасида гиёҳвандлик воситаларини тарғиб етиш учун жавобгарлик белгилаб қўйилган. Гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тарқатиш, реклама қилиш, намойиш этиш мақсадида тайёрлаш билан боғлиқ маъмурий ҳуқуқбузарлик учун ҳуқуқбузарлик ашёларини мусодара қилиб, фуқароларга базавий ҳисоблаш миқдорининг юз бараваридан бир юз эллик бараваригача, мансабдор шахсларга эса — бир юз эллик бараваридан икки юз бараваригача миқдорда жарима солишга ёхуд ҳуқуқбузарлик ашёларини мусодара қилиб, ўн беш суткагача муддатга маъмурий қамоққа олиш жазоси назарда тутилган.

Наркотик воситаларнинг ноқонуний айланмаси билан шуғулланувчилар учун жиноят кодексида ҳам бир қатор жазолар белгилаб қўйилган. Жиноят содир этган шахс бундан аввал маъмурий жавобгарликка тортилган бўлса, жиноят кодексининг 251 (1)-моддаси билан айбдор деб топилиб базавий ҳисоблаш миқдорининг 150 бараваридан 300 бараваригача миқдорда жарима ёки 300 соатдан 360 соатгача мажбурий жамоат ишлари ёхуд 1 йилдан 2 йилгача озодликни чеклаш ёки 1 йилдан 2 йилгача озодликдан маҳрум қилиш билан жазоланади.

Гиёҳвандликка қарши курашиш, аниқроқ айтганда, унинг келиб чиқиш сабаб ва омилларига қарши кураш олиб бориш бугунги куннинг долзарб вазифаларидан ҳисобланади. Зеро, гиёҳвандлик ижтимоий касаллик бўлиб, у нафақат инсоннинг жисмоний ва руҳий ҳолатини издан чиқаради, балки унинг оиласига, ён атрофига, жамиятга зарарли таъсир кўрсатади, турли ижтимоий муаммоларга сабаб бўлади.

Намозов Зиёвуддин,
"Адолат" миллий ҳуқуқий маркази ходими