Маросимда сўзга чиққан агентлик директори Акмал Бурҳонов, Ўзбекистон Нотариал палатаси раиси Дилшод Ашуровлар нотариуслар томонидан видеороликлар орқали коррупцияга қарши курашиш тарғиботини юксак баҳоладилар.

Танловда Қорақалпоғистон Республикаси Тўрткўл туманида хусусий амалиёт билан шуғулланувчи нотариус Зебо Камолова фахрли 1 — ўринни эгаллади. Андижон шаҳрида хусусий амалиёт билан шуғулланувчи нотариус Камолиддин Жалолиддинов 2- ўрин соҳибига айланди. 3- ўринга Наманган вилояти Янгиқўрғон туманида хусусий амалиёт билан шуғулланувчи нотариус Саодатхон Қўзиева тайёрлаган видеоролик муносиб деб топилди.

Мазкур шиор остида 9 декабрь – Халқаро коррупцияга қарши курашиш куни муносабати билан жорий йилнинг ноябрь ойида Ўзбекистон Нотариал палатаси томонидан Ўзбекистон Республикаси Коррупцияга қарши курашиш агентлиги ҳамда “Нотариус маслаҳати” газетаси ҳамкорлигида видеороликлар танлови эълон қилинган эди.

Танловни ўтказишдан мақсад – соҳада олиб борилаётган ислоҳотларга соя солувчи ҳар қандай коррупцияга оид ҳуқуқбузарликларга йўл қўймаслик, коррупцион ҳаракатларга қарши курашишни тарғиб қилиш, нафақат тизимда, балки мамлакатимиз аҳолисига коррупциянинг салбий оқибатлари ҳақида ҳуқуқий тушунчалар бериш, қонунийликни тарғиб қилишдан, фуқароларга уларнинг ҳуқуқлари, эркинликлари ва қонуний манфаатларининг устуворлигини, жавобгарликнинг муқаррарлигини тушунтиришдан иборат.

Видеороликлар танловига нотариуслардан 22 та видеоролик келиб тушди. Уларнинг барчаси ижтимоий тармоқларга жойлаштирилиб, тарғиб қилинди.

Айтиш жоизки, Ўзбекистон Нотариал палатаси тизимида ташкил этилганидан биринчи йилдан бошлаб очиқлик ва шаффофлик ва тизимлиликка, давлат ташкилотлари ҳамда фуқаролик жамияти институтлари билан ҳамкорликка катта эътибор қаратилмоқда.

Шу кунгача 41 та ички ва ташқи меморандумлар имзоланган, шундан мамлакат ичида 19 та давлат ташкилотлари ҳамда ННТлар, жамоат ташкилотлари билан ҳамкорлик меморандумлари тузилган.

Шунингдек, тизимда ҳар йили 3 маротабагача Бош прокуратура ҳузуридаги Иқтисодий жиноятларга қарши курашиш департаменти билан ҳамкорликда семинарлар ўтказиб келинмоқда.

Ғолибларга қимматбаҳо совғалар ва дипломлар топширилди. Шунингдек, 19 нафар видеоролик муаллифларига ҳам иштирокчи сертификати ҳамда совғалар топширилди.