Ўзбекистон ҳудудида ёввойи ҳайвонларни ов қилиш ҳақ тўлаш асосида амалга оширилади. Тўловлар ёввойи ҳайвонларни тутишга доир рухсатномада кўрсатилган ҳар бир ёввойи ҳайвон учун киритилади.

1. Ов қилиш нималарни қамраб олади?

Табиий эркинлик ҳолатида яшаётган ёввойи ҳайвонларни (уларнинг яшаш фаолияти маҳсулотларини) тутиш мақсадида уларни излаш, уларнинг изига тушиш ва уларни таъқиб қилиш, тутишга уриниш ёки тутиш (отиш, тутиб олиш) ов қилишдир.

Қуйидагилар ов қилишга тенглаштирилади:

— ғилофи ечиб қўйилган ҳолатдаги ов қуроли ва ов қилиш қуролларининг бошқа турлари ёки ов маҳсулоти билан ов қилиш жойлари ҳудудида бўлиш;

— шахсларнинг ғилофи ечиб қўйилган ҳолатдаги ов қуроли билан, ов маҳсулотининг қўлга киритилганлиги қонунийлигини тасдиқловчи ҳужжатларсиз умумий фойдаланишдаги йўлларда бўлиши.

2. Овчи ким?

Ҳақиқий овчилик гувоҳномасига эга бўлган жисмоний шахс, шу жумладан Ўзбекистонда вақтинча турган ва ов қилиш соҳасида хизматлар кўрсатиш тўғрисида шартнома тузган чет эллик фуқаро овчидир.

Овчилик хўжалигининг қўриқлаш ходими ўз лавозим мажбуриятларини бажараётганда овчи ҳисобланмайди.

3. Қандай ҳудудалр ов қилиш жойлари бўлиши мумкин?

Ов қилиш жойлари ов қилиш учун фойдаланиладиган ёки фойдаланилиши мумкин бўлган, ёввойи ҳайвонларнинг яшаш муҳити, бўлиш ва урчиш жойлари, уларнинг кўчиб ўтиш йўллари бўлган ерлар, сув объектлари ва ўрмонлардан иборат бўлади.

Ов қилиш жойлари ҳудудида қуйидагилар тақиқланади:

— қишлоқ хўжалиги, мелиоратив, ўрмон хўжалиги ишларини ва бошқа ишларни ёввойи ҳайвонларнинг нобуд бўлишига олиб келадиган усулларда амалга ошириш;

— ўзбошимчалик билан ёввойи қушларнинг тухумларини йиғиш, уяларини вайрон қилиш, ёввойи ҳайвонларнинг уйчаларини, инларини ва бошқа уяларини бузиш, бундан ёввойи ҳайвонлар сонини тартибга солиш билан боғлиқ ҳоллар мустасно;

— қишлоқ хўжалигига мўлжалланган ерларда ҳамда бошқа тоифадаги ерларда қуриган дов-дарахтларни ва уларнинг қолдиқларини илдизи билан ёқиш;

— ёввойи ҳайвонларнинг яшаш муҳити, бўлиш ва урчиш жойларида, шунингдек уларнинг кўчиб ўтиш йўллари бўлган жойларда дов-дарахтларни йўқ қилиб юбориш, қиёқ, қамиш ва ёввойи ҳолда ўсувчи бошқа ўсимликларнинг чакалакзорларини ёқиш.

4. Ёввойи ҳайвонларни тутиш учун қанча ҳақ тўланади?

Ўзбекистон ҳудудида ёввойи ҳайвонларни ов қилиш ҳақ тўлаш асосида амалга оширилади.Тўловлар ёввойи ҳайвонларни тутишга доир рухсатномада кўрсатилган ҳар бир ёввойи ҳайвон учун киритилади. Тўловлар мазкур рухсатномалар берилаётганда киритилади.

Ёввойи ҳайвонларнинг тутиш нормалари белгиланмаган турлари, овда бўлиш кунларининг сонидан қатъи назар, тўловга мувофиқ миқдорда тутилади.

Ёввойи ҳайвонларни тутиш учун тўловлар миқдорлари билан бу ерда танишиш мумкин.

5. Овчи қандай ҳуқуқларга эга?

Овчи қуйидаги ҳуқуқларга эга:

— ёввойи ҳайвонларнинг рухсат этилган турларини ов қилишни белгиланган жойларда ва белгиланган муддатларда амалга ошириш;

— қўлга киритилган ов маҳсулотини ўз ихтиёрига кўра тасарруф этиш;

— ов қилиш, атроф-муҳитни ва табиий ресурсларни муҳофаза қилиш қоидаларига риоя этилиши устидан давлат назоратини амалга оширувчи органларнинг мансабдор шахсларидан ўз шахсини тасдиқловчи ҳужжатлар кўрсатилишини талаб қилиш ҳуқуқига эга.

6. Овчининг мажбуриятлари нималардан иборат?

Овчи қуйидагиларга мажбур:

— ов қилишни амалга оширишда ҳужжатларини ёнида олиб юриши;

— овчилик хўжалиги ва рухсат этилган ҳудуд чегараларини аниқ билиш;

— ҳудуддан ташқарида ов қилишни амалга оширмаслик;

— ёввойи ҳайвонларни тутиш нормаларига ва ов қилиш муддатларига риоя этиши, овни рухсатномада кўрсатилган жойларда амалга ошириши;

— овни бошлаш олдидан овчилик йўлланмасида ов қилиш бошланган сана тўғрисидаги устунни тўлдириши;

— ов қилиш тугагач, ёввойи ҳайвонларни тутишга доир рухсатномада тутилган ёввойи ҳайвонлар ҳақида белгилар қўйиши;

— ов қилиш тугагач, овчилик йўлланмасини ов натижалари тўғрисида белги қўйилган ҳолда, ўн кундан кечиктирмай қайтариши;

— ёнғин хавфсизлиги талабларига риоя этиш;

— маиший чиқиндиларни тўхташ жойидан йиғиштириб олиши ва маиший чиқиндиларни тўплаш жойларига олиб чиқиш;

— ов қилиш, атроф-муҳитни ва табиий ресурсларни муҳофаза қилиш қоидаларига риоя этилиши устидан давлат назоратини амалга оширувчи органлар мансабдор шахсларининг талабига биноан тушунтиришлар бериш ва ҳ.з.;

— ҳалқалари, микрочиплари, ёрлиқчалари, тамғалари бўлган ёввойи ҳайвонлар тутилганда ҳудудида ов қилиш амалга оширилган овчилик хўжалигига ёки экология, атроф-муҳитни муҳофаза қилиш ва иқлим ўзгариши ҳудудий органига улар тўғрисида ахборот тақдим этиш;

— лавҳалар, эълонлар, охурлар, ёйиб қўйилган қўшимча озуқалар, сунъий уяларга ва бошқа биотехник қурилмаларга шикаст етказмаслик;

— ов қилишнинг хавфсизлик қоидаларини билиши ва уларга риоя этиши шарт.