Ўзбекистонда ҳозирда 213 та олийгоҳда 1 300 минг нафардан зиёд талаба таҳсил олмоқда. Бу ҳақда Олий таълим, фан ва инновациялар вазирлиги ахборот хизмати раҳбари Назокат Абдуқундузова маълум қилди.

Келтирилишича, мазкур кўрсаткич орқали ёшларни олий таълим билан қамраб олиш даражаси 2022 йилги 38 фоиздан 42 фоизга ошган.

Ўтган йилда талабалар учун 18 111 ўринли 40 та турар жойлари қурилиб, фойдаланишга топширилган.

Шунингдек, мамлакатда 2023 йилда 7 та янги олий таълим муассасаси фаолияти йўлга қўйилиб, уларнинг сони жами 213 тага етган. Шундан 116 таси давлат, 67 таси нодавлат, 30 таси эса хорижий олий таълим муассасаларидир.

Бундан ташқари, техникумларда грант ўринлар сони 22 368 тага етказилиб, 2022/2023-ўқув йилига нисбатан 1,5 баробарга оширилган. Академик лицей битирувчиларининг олийгоҳларга ўқишга кириш кўрсаткичи 90 фоизга етган.