Аҳолини тадбиркорликка жалб этиш, ишсизлик даражаси юқори бўлган маҳаллалар билан манзилли ишлаш, тадбиркорликни ривожлантириш, аҳолининг доимий даромади ва харид қобилиятини янада ошириш мақсадида Вазирлар Маҳкамасининг “Ҳудудларда кооперацияларни ташкил этиш орқали аҳолининг даромад манбаларини кўпайтириш чора-тадбирлари тўғрисида”ги 414-сонли қарори қабул қилинди.

Қарорга кўра, маҳаллаларда кооперация тизимини ташкил этиш орқали шахсий ёрдамчи ва деҳқон (фермер) хўжаликлари ерларидан самарали фойдаланиш, уларнинг даромадлилигини янада оширишга эришиш режалаштирилган. Ушбу ҳужжат билан аҳоли даромадлари манбаларини кўпайтириш ва ишсизликни бартараф этишнинг қуйидаги йўналишлари белгиланди:

маҳаллаларда ихтисослашув йўналишларини белгилаш, янги лойиҳаларни амалга ошириш;

ўзини ўзи банд қилишни кенгайтириш;

тадбиркорлик фаолияти асосларини ўргатиш;

аҳолини имтиёзли кредитлаш асосида ишлаб чиқариш учун зарур бўлган асбоб-ускуналар ва хомашё билан таъминлаш, шунингдек, ишлаб чиқарилган (етиштирилган) маҳсулотни сотишга кўмаклашиш ва бошқалар.

 2025 йилда камида 30 та туманда етакчи тадбиркорлик субъектларига, деҳқон (фермер) хўжаликлари ва томорқа ерларида қишлоқ хўжалиги маҳсулотларини кооперация асосида етиштириш (балиқчилик, қуёнчилик, чорвачилик, паррандачилик, асаларичилик) ҳамда маҳсулотларни харид қилиш учун 500 миллиард сўм миқдорида кредитлар ажратади.

Кичик ва ўрта тадбиркорлик субъектига ишсиз ёки даромад олиш манбаини кўпайтириш истагида бўлган фуқаролар билан тузилган кооперация шартномалари бўйича қуйидагича миқдорларда кредит ажратилади:

30 тагача шартнома тузадиган кичик ва ўрта тадбиркорлик субъектларига 1 миллиард сўмгача;

31 тадан 100 тагача шартнома тузадиган кичик ва ўрта тадбиркорлик субъектларига 3 миллиард сўмгача;

101 тадан ортиқ шартнома тузадиган кичик ва ўрта тадбиркорлик субъектларига 5 миллиард сўмгача.

Кичик ва ўрта тадбиркорлик субъектларига:

“Тадбиркорликни ривожлантириш компанияси” акциядорлик жамияти томонидан кредит суммасининг 50 фоизи миқдоригача умумий тартиб асосида кафиллик берилади;

кооперация асосида ишлаётган фуқаро томонидан ишлаб чиқарилаётган (етиштирилаётган) маҳсулотларни сотиб олиш ёки шартномага асосан фуқарога ойлик иш ҳақи тўлаш шарти белгиланади.