Вазирлар Маҳкамасининг 382-сонли қарори билан бирламчи тиббий-санитария ёрдами (БТСЁ) муассасаларида Давлат бюджети маблағлари ҳисобидан қопланадиган тиббий ёрдамнинг кафолатланган ҳажмлари (кафолатланган пакет) тасдиқланди.

Президентимизнинг 2024 йил 5 сентябрдаги ПҚ-311-сонли “Давлат тиббий суғуртаси механизмларини жорий этишга оид чора-тадбирлар тўғрисида” қарорига мувофиқ ҳужжат билан тасдиқланди:

бирламчи тиббий ёрдам муассасаларида Давлат бюджети маблағлари ҳисобидан қопланадиган тиббий ёрдамнинг кафолатланган ҳажми (кафолатланган пакет);

кафолатланган пакетга киритилган тиббий хизматлар ва дори воситалари рўйхати;

бирламчи тиббий ёрдам муассасалари учун кафолатланган пакетни ҳисоблаш тартиби тўғрисидаги низом.

Имтиёзли тоифадаги шахсларни даволаш врач кўрсатмаси бўйича “Электрон соғлиқни сақлаш” ахборот тизими орқали шаклланган йўналма асосида Давлат бюджети маблағлари ҳисобига бепул амалга оширилади.

Хусусан, бепул тиббий хизматлар рўйхатига қуйидагилар киритилган:

беморларни қабул қилиш, даволаш ва маслаҳат бериш;

болаларни ёш тоифалари бўйича даврий профилактик ва скрининг текширувлари;

диагностика учун зарур таҳлиллар ва текширувлар (жумладан, қон таркибидаги глюкоза ва холестерин даражасини текшириш, 40 ёшдан ошган аҳолида электрокардиограмма, бачадон бўйни скринингини, аёллар орасида саратонни профилактика қилиш учун кўкрак скринингини, антропометрия, аускультация, офтальмоскопия, риноскопия ва бошқалар).

Ҳар йили 1 августгача Соғлиқни сақлаш вазирлиги келгуси йил учун кафолатланган пакет ҳажмини шакллантиради, зарур маблағлар эса Иқтисодиёт ва молия вазирлиги томонидан Давлат бюджети параметрларида ҳисобга олинади.

Кафолатланган пакет аҳоли орасида энг кенг тарқалган касалликларни профилактика қилиш ва даволашга қаратилган бўлиб, қуйидаги тиббий хизматлар турларини қамраб олади:

шошилинч тиббий ёрдам;

режали тиббий хизмат кўрсатиш;

паллиатив тиббий ёрдам.

Эслатма тариқасида, 2026 йил 1 январдан бошлаб давлат тиббий суғурта механизмлари жорий этилган вилоятларда туман (шаҳар) ва ҳудудий даражадаги тиббиёт муассасаларида электрон навбат асосида режали стационар тиббий ёрдамни бепул олиш ҳуқуқига эга бўладилар:

ЖШДСни ёки ижтимоий солиқни тўловчилар;

Солиқ кодексига мувофиқ меҳнат стажини ҳисоблаш учун зарур бўлган белгиланган солиқ миқдорларини тўлаган шахслар;

вояга етмаганлар, таълим ташкилотларининг ўқувчи ва талабалари, ҳомиладор аёллар ва икки ёшгача бола парвариши билан банд шахслар, меҳнат органлари томонидан ишсиз сифатида расман рўйхатга олинган шахслар, давлат пенсиясини олувчилар ва “Ижтимоий ҳимоянинг ягона реестри” ахборот тизими орқали кам таъминланган деб тан олинган оилалар аъзолари ёки “Камбағал оилалар реестри” ахборот модули орқали камбағал деб тан олинган оилалар аъзолари.