Тегишли қарор лойиҳаси халқ депутатлари Тошкент вилояти Кенгаши томонидан маъқулланди.

Тошкент вилоятининг Сирдарё ва Наманган вилоятлари билан чегарадош айрим ҳудудларида ҳудудлараро чегараларни тенглаштириш мақсадида ҳудудий ўзгартиришлар киритилиши режалаштирилмоқда.

Бу ҳақда халқ депутатлари Тошкент вилояти Кенгашининг навбатдаги сессиясида Тошкент вилояти Кадастр бошқармаси томонидан ишлаб чиқилган қарор лойиҳаси тақдимоти чоғида маълум қилинди, деб хабар беради пойтахт вилоят ҳокимлиги матбуот хизмати.

Лойиҳага кўра, қуйидаги ўзгартиришлар таклиф этилади:

—Сирдарё вилоятининг 5 та (Сирдарё, Сайхунобод, Гулистон, Боёвут туманлари ва Ширин ш) ҳудудидан 310,4 гектар ер майдони Тошкент вилояти ҳудудига ўтказилади;

— Тошкент вилоятининг 6 та туманидаги (Чиноз, Қуйичирчиқ, Оққўрғон, Бўка, Бекобод туманлари ва Бекобод шаҳри) ҳудудидан 347,2 гектар ер майдони Сирдарё вилояти ҳудудига ўтказилади;

— Наманган вилоятининг Поп туманидаги 38,8 гектар ер Тошкент вилоятига ўтказилади;

— Тошкент вилоятининг Оҳангарон туманидаги 26,3 гектар ер майдони Наманган вилоятига ўтказилади.

Мазкур қарор лойиҳаси депутатлар томонидан маъқулланди.