Давлатимиз рамзлари ўзида узоқ ўтмишимиз, миллийлигимиз, анъаналаримиз ва қадриятларимизни мужассам этганлиги билан бебаҳодир.

Улар халқимизнинг азалий орзуси хисобланган озодлик, ҳурлик, эркинлик каби буюк неъматларнинг рўёби сифатида ҳам кўз олдимизда гавдаланади.

Тинчлик, бағрикенглик, миллатлараро дўслик ва ҳамжиҳатлик миллий байроғимиздаги ранглар уйғунлиги каби бир-бирига ҳамоҳанглик касб этади.

Сабаби юртда тинчлик бўлса, турфа хил миллатлар бир-бири билан аҳил-иноқ яшаса байроғимиз осмонимиз узра мудом ҳилпирайверади.

Байроқ ғурур ва ифтихор рамзи ҳамдир. Жаҳон минбарларида овозимиз, халқаро ареналарда шавкату шонимиз, дунё саҳналарида истъдодимиз билан бирга бўй кўрсатади.

Шуни фахр билан айтамизки, ўтган йиллар давомида қанчадан-қанча спортчиларимиз Олимпиада ўйинлари, Осиё ва жаҳон чемпионатлари, нуфузли халқаро спорт мусобақаларида, кўплаб санъаткорларимиз халқаро саҳналарда Ватанимиз байроғини баланд кўтаришга эришдилар. Ҳа, байроқ кишига ана шундай ғурур ва ифтихор бағишлайди. Яна бир қувончли жиҳат “Ўзбекистон Республикасининг Давлат байроғи тўғрисида”ги Ўзбекистон Республикаси Қонунига ўзгартиш ва қўшимчалар киритиш орқали Давлат байроғидан фойдаланилиши мумкин боʻлган ҳолатлар кенгайди.

Эндиликда байроқ ва унинг тасвири туширилган белгилардан жамоат жойларида, биноларда, яшаш ёки иш жойларида, транспорт салонида, байроқдан спорт мусобақалари, оммавий, тантанали ва маданий тадбирларда, оилавий байрамларда, хотира саналарни нишонлашда, жамият ва давлат арбоблари, ҳарбий хизматчилар дафн маросимларида, халқаро спорт мусобақалари ҳамда Ўзбекистон чемпионатлари учун спорт кийимларини тайёрлаш учун байроқнинг тасвири туширилган белгилардан фойдаланиш мумкин.

Миллийлигимиз тимсоли бўлган байроғимизга бўлган ҳурмат, ўзлигимизга, тарихимизга, қолаверса, келажагимизга ҳам бўлган эҳтиромдир.

Ирода Аблакулова,

Жиззах вилоят адлия бошқармаси бош маслаҳатчиси