Ўзбекистон Республикаси Президенти “Ўзбекистон Республикасида электромобиль ва гибрид автомобиллар ҳамда уларнинг бутловчи қисмларини ишлаб чиқаришни ташкил этиш” инвестиция лойиҳасини амалга ошириш тўғрисидаги инвестиция шартномасини тасдиқлаш ҳақида” қарор қабул қилди.

Унга мувофиқ, лойиҳани амалга ошириш даврида умумий қиймати 160 миллион АҚШ доллари миқдорида инвестиция, шу жумладан 60 миллион АҚШ доллари миқдорида тўғридан-тўғри хорижий инвестициялар жалб этилади.

Лойиҳанинг биринчи босқичида (2024 йил давомида) ишлаб чиқариш қуввати майда узелли йиғиш (CKD) усулида 50 минг дона электромобиль ва гибрид автомобилга етказилади.

Ишлаб чиқариладиган электромобиль ва гибрид автомобиллар учун босқичма-босқич маҳаллий корхоналарда бутловчи ва эҳтиёт қисмлар, шу жумладан ойналар, ўриндиқлар, пластик қисмлар ва бамперларни маҳаллийлаштириш йўлга қўйилади.

Лойиҳа доирасида маҳаллий аҳоли учун 1000 та янги иш ўринлари яратилиши кўзда тутилган.

Инвестиция лойиҳасини амалга оширишнинг кейинги даврларида электромобиль ва гибрид автомобиллар ишлаб чиқариш қувватини босқичма-босқич йилига 500 минг донагача ошириш;

Ишлаб чиқариладиган электромобиль ва гибрид автомобилларнинг маҳаллийлаштириш даражасини 60 фоизгача етказиш;

маҳаллий аҳоли учун 10 000 та янги иш ўринларини яратиш кўзда тутилган.