Япония ҳукумати Нанкай ёриғида кутилаётган ўта кучли зилзилага тайёрланмоқда, деб ёзади “Интерфакс”

Япония метеорология агентлиги тарихда биринчи марта «мегазилзила» ҳақида огоҳлантирди. Агентлик расмийлари 29 префектурадаги 707 муниципалитетни ер силкинишларига тайёргарлик даражасини кўриб чиқишга чақирди.

Сейсмологларнинг таъкидлашича, зилзила қачон содир бўлиши ҳозирча маълум эмас. Аҳолига ҳушёр бўлиш тавсия этилади.

Бир кун аввал Япониянинг Кюсю оролининг шарқий қирғоқлари яқинида 7,1 магнитудали зилзила содир бўлган эди ва унда 16 киши жароҳатланган.

Ушбу вазият фонида Япония Бош вазири Фумио Кисида 9-12 август кунларига режалаштирилган Қозоғистон, Ўзбекистон ва Мўғулистонга сафарини бекор қилди.

Нанкай ёриғи Тинч океанининг туби бўйлаб Япониянинг Сидзуока префектурасидан Сикоку ва Кюсю оролларигача ўтади.

Мегазилзила Рихтер шкаласи бўйича 9,0 дан юқори магнитуда билан тавсифланади.