Ўзбекистон Республикаси мустақиллигининг ўттиз икки йиллиги арафасида 123 ёшли Бийбихан Акимниязова “Шуҳрат” медали билан тақдирланди. Бу ҳақда UzA хабар берди. Қайд этилишича, онахон 1900 йилда Чимбой туманида таваллуд топган. 1968 йилдан Тахтакўпир тумани “Ўзбекистон” маҳалла фуқаролар йиғинида яшаб келмоқда. Дастлаб собиқ жамоа хўжалигида, иккинчи жаҳон уруши даврида ва урушдан кейинги йилларда халқ хўжалигининг турли соҳаларида меҳнат қилган. Қорақалпоғистон Республикаси Жўқорғи Кенгеси раиси Аманбай Оринбаев байрам арафасида онахон хонадонида бўлиб, Ўзбекистон Республикаси мустақиллигининг ўттиз икки йиллиги билан табриклади. Унга “Шуҳрат” медалини ҳамда байрам совғаларини топширди.