Ўзбекистон Республикаси Президентининг 26.03.2025 йилдаги ПФ-61-сон Фармонига мувофиқ, ёшларнинг ташаббусларини қўллаб-қувватлаш, сифатли таълим олишлари учун имкониятларни янада кенгайтириш, илм-фанни оммалаштириш мақсад қилиб белгиланди.

“Эл-юрт умиди” жамғармаси орқали хорижий мамлакатларда таълим олиб, юртга қайтган мутахассислар мамлакат тараққиёти учун муҳим илмий, иқтисодий ва бошқарув салоҳиятини шакллантиришда асосий роль ўйнайди. Ушбу стипендия дастури фақатгина таълим имкониятини эмас, балки стипендиатларга бир қатор ҳуқуқий ва амалий имтиёзларни ҳам тақдим этади. Қуйида “Эл-юрт умиди” стипендиатлари учун белгиланган 5 та муҳим имтиёз билан танишиб чиқишингиз мумкин.

1. Миллий кадрлар рўйхатига тўғридан-тўғри киритилади

“Эл-юрт умиди” жамғармаси орқали хорижий олий таълим муассасаларида таҳсил олиб қайтган стипендиатлар миллий кадрлар захирасига тўғридан-тўғри киритилади. Шунингдек, улар давлат органлари, ташкилотлари ва муассасаларида иш фаолиятини олиб бориш учун алоҳида танловларсиз қабул қилиниши белгиланган.

2. Кам таъминланган оилалар фарзандлари учун мақсадли танлов 

Ҳар йили “Эл-юрт умиди” жамғармаси ташаббуси билан оғир ижтимоий шароитда яшовчи, билимга чанқоқ ва иқтидорли ёшлар қўллаб-қувватланади. Хусусан, камбағал оилалар фарзандларини хорижда ўқитиш мақсадида ҳар бир маҳаллада фаол ва салоҳиятли ёшлар саралаб олинади ва улар учун алоҳида имкониятлар яратилади. Бундан ташқари  «Ёрқин истеъдод» лойиҳаси йўлга қўйилади.

3. Салоҳиятли ёшлар учун мақсадли тайёргарлик ва йўналтириш

Саралаб олинган иқтидорли ёшларнинг қобилияти ва салоҳиятини баҳолаш орқали уларни индивидуал имкониятларига мос равишда хорижий олий таълим муассасаларига юбориш кўзда тутилади. Бу мақсадда улар тайёргарлик курсларида ўқитилади ва зарур таълимий кўникмалар билан таъминланади.

4. Нуфузли хорижий университетларда таълим ва тўлиқ молиявий қўллаб-қувватлаш  

Тайёргарлик курсларида муваффақиятли таҳсил олган ёшлар нуфузли халқаро рейтинглардаги юқори 100 талик рўйхатга киритилган хорижий олий таълим муассасаларида бакалавриат босқичи бўйича таълим олиш учун юборилади. Улар учун ўқиш ва яшаш харажатлари тўлиқ давлат томонидан “Эл-юрт умиди” жамғармаси маблағлари ҳисобидан қоплаб берилади. Тайёргарлик курслари ҳам мазкур жамғарма ҳисобига молиялаштирилади

5. PhD даражасига эга ёш мутахассисларга уй-жой учун фоизсиз ссуда

Нуфузли халқаро рейтинг ташкилотларининг юқори 100 талик рўйхатига киритилган хорижий олий таълим ташкилотларида илмий даража (PhD ва унга тенглаштирилган бошқа илмий даража) олган 35 ёшгача бўлган мутахассисларга уй-жой сотиб олиш учун уй-жой жойлашган ҳудуддан келиб чиқиб, ўн йил муддатга базавий ҳисоблаш миқдорининг 2 150 бараваригача миқдорда фоизсиз ссуда ажратилади

Хулоса ўрнида шуни таъкидлаш жоизки, “Эл-юрт умиди” жамғармаси орқали хорижда таълим олган ёшлар нафақат илмий ва касбий салоҳияти юқори мутахассис сифатида, балки миллий кадрлар захирасини бойитишда, давлат бошқаруви ва жамият тараққиётида фаол иштирок этувчи етакчи шахслар сифатида шаклланмоқда. Ушбу дастур доирасида тақдим этилаётган имтиёзлар ёшларни рағбатлантириш, ижтимоий тенгликни таъминлаш ва стратегик кадрлар тайёрлаш борасида муҳим аҳамият касб этади. Давлатнинг бундай қўллаб-қуввати билимли авлодни тарбиялашга, иқтидорли ёшларни юрт равнақи йўлида сафарбар этишга хизмат қилади.