Қонунчиликка кўра, алимент тўлаш тўғрисидаги келишув  алимент тўлаши шарт бўлган шахс билан алимент олувчи ўртасида тузилади. Келишувда алимент миқдори, шартлари ва тўлаш тартиби белгиланади.

Агар алимент олувчи муомалага лаёқатсиз бўлса, келишув унинг қонуний вакили билан тузилади.

Келишув ёзма шаклда тузилиб, нотариал тартибда тасдиқланиши лозим. Бундай келишув ижро варақаси кучига эга бўлади.

Шунингдек, алимент тўлаш тўғрисидаги келишув тарафларнинг ўзаро розилиги билан исталган вақтда ўзгартирилиши ёки бекор қилиниши мумкин. У қандай шаклда тузилган бўлса, уни ўзгартириш ёки бекор қилиш ҳам ўша шаклда амалга оширилади.
Келишувнинг бажарилишини бир тарафлама рад қилишга ёки унинг шартларини бир тарафлама ўзгартиришга йўл қўйилмайди.

Бундан ташқари, тўланадиган алиментларнинг миқдори шу келишувда белгиланади.
Вояга етмаган болаларга алимент тўлаш тўғрисидаги келишувга биноан тўланадиган алиментнинг миқдори алимент суд тартибида ундирилганда болалар олиши мумкин бўлган миқдордан кам бўлмаслиги керак.