Жорий йилнинг 25 январь куни соат 23:30 да Андижон вилояти Шаҳрихон туманида жойлашган Асака автотураргоҳида ташкил этилган буюм бозорида ёнғин содир бўлган. Мазкур ҳолат юзасидан ФВВ Матбуот хизмати расмий маълумот берди.

Қайд этилишича, Шаҳрихон туманидаги Асака автотураргоҳида ташкил этилган буюм бозори ҳудудида ёнғин содир бўлганлиги тўғрисида соат 23:30 да ФВБга хабар тушган. Шунга кўра, 20 та ёнғин-қутқарув экипажи соат 23:32 да ҳодиса жойига етиб бориб, ёнғин 26 январь куни соат 00:30 да ўраб олинган ва соат 01:53 да бартараф этилди.

Ёнғин натижасида тахминан 700-800 кв.м майдон ёниб зарарланган.

Ёнғин натижасида тан жароҳати олган ва вафот этган фуқаролар тўғрисида маълумотлар келиб тушмаган.

“Ҳозирда ёнғин сабаби ва моддий зарар миқдори аниқланмоқда”,- дейилади хабарда.

Ёнғин хавфсизлиги қоидаларини бузганлик учун қандай жавобгарлик бор?

Ўз навбатида эслатиб ўтиш жоиз, корхоналарда, муассасаларда, ташкилотларда, жамоат жойларида, омборхона биноларида, ётоқхоналар ва турар жойларда, шунингдек тегишли объектларни лойиҳалаштириш, қуриш ва қайта қуриш чоғида ёнғин хавфсизлиги қоидаларини бузиш ёки ёнғинга қарши инвентарлар, ускуналар, ёнғинни аниқлаш ва ўчиришнинг автомат воситаларидан фойдаланиш ва уларни сақлаш қоидаларини бузиш – фуқароларга БҲМнинг ўндан бир қисмидан 1 бараваригача (33 минг сўмдан 330 минг сўмгача); мансабдор шахсларга эса – 1 бараваридан 3 бараваригача (330 минг сўмдан 990 минг сўмгача) миқдорда жарима солишга сабаб бўлади.