Савол: Мен яқинда 2 ойлик муддатли шартнома асосида ишга қабул қилиндим. Байрам кунлари ҳам ишга чиқдим, албатта ўз розилигим билан. Лекин менга ҳақ беришларини талаб қилсам бошлиғимиз дам олиш кунларида ишладингиз шунинг учун табелга ойлик ёзолмайман деяпти. Айтингчи, шу тўғрими?

Юрист маслаҳати: Қонунчиликка кўра, ишланмайдиган байрам кунларидаги иш учун қуйидагиларга камида 2 ҳисса миқдорида ҳақ тўланади:

ишбай ишловчиларга — камида 2 ҳиссали ишбай баҳолар бўйича;

меҳнатига кунбай ва соатбай тариф ставкалари бўйича ҳақ тўланадиган ходимларга — кунбай ёки соатбай тариф ставкасининг камида 2 ҳиссаси миқдорида;

маош оладиган ходимларга — ҳар бир ишланган кун ёки соат учун маошдан ташқари кунбай ёки соатбай ставкасининг камида 1 ҳиссаси миқдорида.

Сизнинг айтаётган вазиятингизга тўхталадиган бўлсак, Меҳнат кодексига мувофиқ, икки ойгача бўлган муддатга меҳнат шартномаси тузган ходимлар ушбу муддат доирасида ишланмайдиган байрамлар кунларида ўз ёзма розилигига кўра ишга жалб қилиниши мумкинлиги белгиланган.

Бунда Сизга камида 2 ҳисса миқдорида пул шаклида компенсация ҳам берилиши лозим.

Лобар Розимова,
"Адолат" МҲАМ ходими